Екі тоқтап тұрған элеватор Қазақстанның солтүстігінде астық қабылдай бастады

Қазақстанның лицензияланған астық қоймаларында 7,6 млн тоннаға бос орын бар, бұл ретте қоймалардың жалпы жүктемесі 42% құрайды. Жаңа егіннің астығын қабылдау үшін биыл Солтүстік Қазақстан және Қостанай облыстарында екі тоқтап тұрған элеватор қайта пайдалануға берілді, деп хабарлады ҚР Ауыл шаруашылығы министрлігінің баспасөз қызметі.

Солтүстік Қазақстан облысында сақтау сыйымдылығы 74,6 мың тонна «Ащыкөл элеваторы» ЖШС, Қостанай облысында сақтау сыйымдылығы 173 мың тонна «Олжа Денисовское 1» ЖШС элеваторы іске қосылды. Қазіргі уақытта астық қабылдау жүріп жатыр.

Ауыл шаруашылығы министрлігінің мәліметінше, бүгінде Қостанай облысында астықты сақтаудың бос қуаты 1,6 млн тоннаны, Солтүстік Қазақстан облысында - 1,8 млн тоннаны, Ақмола облысында - 2,5 млн тоннаны құрайды.

«Ағымдағы сақтау қуаты егін жинау мен сақтауды тиімді басқару үшін жеткілікті», - деді ведомстводан.

Бүгінгі таңда Қазақстанда орташа өнімділігі гектардан 16 ц болатын 26,6 млн тонна дәнді және дәнді-бұршақты дақылдар бастырылды. Республика бойынша астықты сақтаудың жалпы сыйымдылығы 30 млн тоннаны құрайды.