Қытай Қазақстаннан жемдiк ұн импортын ұлғайтады
Тағы 19 қазақстандық компания ҚХР Бас кеден басқармасының (БКБ) тізіліміне жемдік ұн жеткізу құқығымен енгізілген. Бұл туралы KazGrain Ұлттық экспорттаушылар қауымдастығы хабарлады.
Естеріңізге сала кетейік, наурыз айының соңында Қытай Аспан асты елiнде жұмыс істегісі келетін қазақстандық экспорттаушылар үшін жаңа ережелер енгізді. Техникалық жарақтандыру; өндірісте тек қазақстандық шикізатты пайдалану; бидай, арпа және кебектен басқа кез келген бөгде ингредиенттерді алып тастау тізілімге енгізудің шарттары болды.
Сонымен қатар, Қытай жемдік ұнды жеткізуші делдал емес, өндіруші компанияның өзі болуын талап етеді.
Бірінші кезеңде ҚХР тізілімге 27 компанияны енгізді, нәтижесінде «сыртында» тағы ондаған қазақстандық өндірушілер қалды. Қазақстанның мемлекеттік органдарының қатысуымен тағы 39 компанияның екінші тізімі құрылып, ҚХР БКБ-на берілді. Сонымен, сәуір айының ортасында олардың 19-ы Қытайға жемдік ұнды жеткізуге құқылы болды.
Қалған өтініш берушілер бойынша жұмыс жүргізілуде. Бүгінгі таңда 46 қазақстандық компания Қытайға жемдік ұнды жеткізуге құқылы.
Естеріңізге сала кетейік, бұған дейін Қазақстанның Астық одағы 2026 жылы Қытайға қазақстандық жемдік ұн экспортын екі есе ұлғайту болжамын айтқан болатын - ол 2025 жылғы 1,5 млн тоннамен салыстырғанда 3 млн тонна деңгейінде күтілуде. Қытай қазақстандық жемдік ұн көлемінің 99%-ын сатып алушы болып табылады.