Жамбыл облысының Ауыл шаруашылығын дамытуға 100 млрд теңге бөлінеді

Жамбыл облысының ауыл шаруашылығын дамытуға жалпы 100 млрд теңгеден астам қаражат бөлу көзделген. Бұл туралы ElDala.kz өңір әкімінің баспасөз қызметіне сілтеме жасай отырып хабарлайды.

Ауыл шаруашылығы басқармасының басшысы Нұрби Жігітековтың айтуынша, ағымдағы жылы ауыл шаруашылығын дамытуға 21,9 млрд теңге қарастырылған. Қажет болған жағдайда жыл ішінде бюджетті нақтылау кезінде қосымша 13 млрд теңге бөлу жоспарлануда.

Сонымен қатар, ауыл тұрғындарының табысын арттыру бойынша пилоттық жобаны іске асыруға 11,5 млрд теңге бөлінді. Бұл ақшаға 22 ауылдық округте 1909 жобаны іске асыру жоспарлануда, ал қосымша жобалар шеңберінде 40 ауылдық округті қаржыландыруға 20 млрд теңге бағытталатын болады.

Бұдан басқа, республикалық бюджеттен сүт-тауар фермаларын құру, көкөніс базаларын салу, құс шаруашылығы және балық шаруашылығы сияқты жобаларды іске асыруға 34 млрд теңге бөлу көзделіп отыр.

2023 жылы ауыл шаруашылығы өнімін 680,6 млрд теңгеге өндіру, ауыл шаруашылығының негізгі капиталына 55,2 млрд теңге, азық-түлік өндірісінің негізгі капиталына 4,4 млрд теңге инвестиция тарту көзделген.

Бұл ретте ауыл шаруашылығы дақылдарының егіс алқаптарын 770,7 мың гектарға дейін, қант қызылшасы егістерін 10 мың гектарға дейін ұлғайту, су үнемдеу технологияларын 57 мың гектарға енгізу, ауыл шаруашылығы техникасын жаңғырту жоспарлануда.

Биыл облыста 104,3 млрд теңге сомасына 12 инвестициялық жобаны іске асыру және 785 жаңа жұмыс орнын құру жоспарлануда.

Кездесу соңында облыс әкімінің орынбасары Қанатбек Мәдібек басқарма басшылығына, аудан әкімдерінің орынбасарларына және ауыл шаруашылығы бөлімдерінің басшыларына ауыл шаруашылығы алаңдарының құрылымын әртараптандыруды, ауыл шаруашылығын сапалы тұқыммен және егіс алқаптарын міндетті сақтандыруды қамтамасыз етуді, әр ауданда өнімділігі жоғары тұқым шаруашылықтарын ашуды, көкөніс кластерін құруды, инвестициялық жобаларды іске асыруды тапсырды.