БҚАТУ профессоры әлемдегі ең беделді ғалымдар тізіміне енді

Әлемнің ең беделді ғалымдарының 2% (World's Top 2% Scientists) рейтингіне профессор, Жәңгір хан атындағы Батыс Қазақстан аграрлық-техникалық университетінің техника ғылымдарының докторы Сәрсенбек Монтаев енді. Бұл туралы ElDala.kz Ауыл шаруашылығы министрлігінің баспасөз қызметіне сілтеме жасай отырып хабарлайды.

Ведомствоның хабарлауынша, Elsevier ғылыми баспасының соңғы мәліметтері бойынша әлемдегі ең үздік ғалымдарды Стэнфорд университетінің сарапшылары құрастырған. Рейтинг библиометриялық зерттеулерге негізделген: ғалымдардың бүкіл мансап жолындағы және өткен жылдағы дәйексөздері.

Сәрсенбек Монтаев соңғы жылдары БҚАТУ-да жұмыс істейді, қазір университеттің индустриалды-технологиялық институтын басқарады. Құрылыс материалдарын өндіруде жаңа технологияларды әзірлеуші, сондай-ақ ауыл шаруашылығы мақсатындағы жерлердің топырақтарының құрылымдық-механикалық қасиеттерін жақсарту жөніндегі жобаның басшысы болып табылады.

Профессор "Болашақ" бағдарламасы аясында Жапонияда "Нанотехнология" мамандығы бойынша ғылыми тағылымдамадан өтті.