Қазақстанның ауыл шаруашылығына инвестициялар 33%-ға өсті

Қаңтар-ақпан айларында Қазақстанда ауыл шаруашылығына инвестициялар ағыны 33,1% - ға өсті. Бұл туралы Ұлттық экономика министрі Әлібек Қуантыров Үкімет отырысында мәлімдеді.

Оның айтуынша, есепті кезеңде негізгі капиталға салынған инвестициялардың өсу қарқыны 19,2%  құрады. Инвестициялар ағыны ауыл шаруашылығында – 33,1%-ға, өнеркәсіпте -14,1%-ға, оның ішінде өңдеу өнеркәсібінде - 7,2% - ға өсті.

"Өңірлік бөліністе үздік көрсеткіштер Ұлытау облысында, сондай-ақ Маңғыстау, Павлодар және Қарағанды облыстарында байқалады", - деді Қуантыров. 

Сонымен қатар, ол өңдеу өнеркәсібі оң өсу қарқынын сақтап отырғанын атап өтті. Өндіріс көлемі 2,5% - ға өсті. Оң өсім 16 өңірде тіркелді. Ең үлкен өсім Солтүстік Қазақстан және Алматы облыстарында, сондай-ақ Ұлытау облысында және Алматы қаласында байқалады.

Өңдеу өнеркәсібі салалары бөлінісінде тамақ өнімдері өндірісінің – 9,6% – ға, химия өнеркәсібі өнімдерінің – 3,6% - ға, сусындардың -22,6% - ға өсуі қамтамасыз етілді.

Ауыл шаруашылығында жалпы өнім көлемі 3,9%-ға өсті. Саладағы өндірістің оң өсуі 16 өңірде тіркелді. Ең үлкен өсімді Шығыс Қазақстан, Маңғыстау, Ақмола және Қостанай облыстары көрсетті.

Барлық көрсеткіштер бойынша 6 өңірде – Абай, Батыс Қазақстан, Маңғыстау және Павлодар облыстарында, сондай-ақ Алматы және Шымкент қалаларында оң өсім байқалады. 6 көрсеткіш бойынша 9 өңірде өсім байқалады. Бұл Ақмола, Алматы, Атырау, Жамбыл, Қарағанды, Қостанай, Қызылорда, Солтүстік Қазақстан және Түркістан облыстары.

Ұлттық экономика министрі хабарлағандай, қаңтар-ақпан айларында Қазақстан экономикасының өсу қарқыны 4,3% құрады.

Алдын ала қорытындылар бойынша 2023 жылғы қаңтарда сыртқы сауда тауар айналымы 15,7% - ға өсіп, 10,3 млрд долларды құрады. Оның ішінде экспорт бойынша көрсеткіш 0,4%-ға өсіп, 6,1 млрд долларды құрады. Бұл ретте өңделген тауарлар экспорты 21,5% - ға 2,1 млрд долларға дейін өсті. Тауарлар импорты жалпы алғанда 4,2 млрд долларға жетті, оң сауда балансы 1,9 млрд долларға тең.