Қазақстанда АӨК үшін несиелер бойынша сыйақы мөлшерлемелері сараланады

Қаржы министрлігі экономиканың басым секторлары үшін несиелер бойынша сыйақы мөлшерлемелерін саралауды енгізу жөніндегі қаулының жобасын әзірледі. Ең басым салалар тізбесіне АӨК-де өндіріс пен қайта өңдеуді қосу ұсынылады. Бұл туралы Үкіметте кәсіпкерлікті дамыту мәселелері жөніндегі кеңес барысында белгілі болды.

"Өзгерістердің жаңа пакеті шеңберінде АӨК-де өндіріс пен қайта өңдеу экономиканың неғұрлым басым салаларының тізбесіне енгізу және сыйақы мөлшерлемесінің мемлекет субсидиялайтын бөлігін 13,25% деңгейінде, қалған ЭҚЖЖ үшін 11,25% деңгейінде белгілеу ұсынылады", - деп хабарлады ҚР Ұлттық экономика бірінші вице-министрі Тимур Жақсылықов.

Сонымен қатар, үкіметтің хабарлауынша, 2022 жылғы 30 желтоқсандағы Заңмен мемлекеттік-жекешелік әріптестіктің жаңа тиімді моделіне көшуге бағытталған мемлекеттік-жекешелік әріптестік саласындағы заңнамаға түзетулер енгізілді. МЖӘ шарттарын жасасу тек конкурстық негізде жүзеге асырылатын болады. Бұл ретте тікелей келіссөздер тетігі ерекше жағдайларда - бірегей объектілерді құру үшін үкіметтің шешімі бойынша ғана қолданылатын болады.

Жекелеген жобалар бойынша инвестициялық шығындардың өтемақыларын төлеуді шектеу көзделеді, сондай-ақ қоса қаржыландыру бойынша шектеу енгізілді. Бұл шаралар артық маржиналдылықты төмендетуге бағытталған. Цифрлық форматқа көшу жолымен іске асырылатын МЖӘ жобаларын жоспарлау және іске асыру процесінің ашықтығы мен қолжетімділігінің жаңа қағидаты енгізілді.

Кеңесті қорытындылай келе, ҚР премьер-министрінің орынбасары–Қаржы министрі Ерұлан Жамаубаев Ұлттық экономика министрлігіне мемлекеттік органдар мен бизнес субъектілері арасында МЖӘ жаңа моделін іске асыру бойынша түсіндіру жұмыстарын жүргізуді қамтамасыз етуді тапсырды.