Қазақстанда күн ыстық болуда

18-20 шілдеде Қазақстанда күн ыстық болып, жел тұрып, өткінші жаңбыр жауады. Бұл туралы Қазгидромет хабарлайды.

«Оңтүстік циклонның әсерінен Қазақстанның барлық аумағында ауа-райы тұрақсыз болады. Кей жерлерде қысқа мерзімді жаңбыр жауады, күн күркірейді, жел күшейеді, бұршақ жаууы мүмкін», - деп хабарлайды синоптиктер.

Сонымен бірге ауа температурасы 30-38, оңтүстік пен батыстың кей жерлерінде 42 градусқа дейін көтеріледі.

Сондай-ақ, болжам бойынша, республиканың кей жерлерінде жел күшейіп, шаңды дауыл тұрады.

Қазгидрометтің ескертуі бойынша, 18 шілдеде Солтүстік Қазақстан, Ақмола және Батыс Қазақстан облыстарының кей жерлерінде күн күркіреп, секундына 15-20 метрге дейін жел тұрады деген болжам айтылуда.

18 және 19 шілдеде Жамбыл облысының кей жерлерінде найзағай ойнайды. Батыстан және оңтүстік-батыстан соққан желдің екпіні секундына 15-20 метрге жетеді.