Қазақстанда ветеринариялық зертханалар базасында COVID-19 үшін ПТР тестілеу ұйымдастырылатын болады

Бүгін ҚР Премьер-Министрі Асқар Мамин үкіметтің отырысында Денсаулық сақтау министрлігі мен Ауыл шаруашылығы министрлігіне әкімдіктермен бірлесіп, аймақтарда ветеринариялық зертханалар негізінде ПТР тестілеу жұмыстарын ұйымдастыруды тапсырды.

Бұл жұмысты шілде айының соңына дейін орындау қажеттігі айтылды.

Аталған жиналыс барысында Денсаулық сақтау министрі Алексей Цой айтқандай, ветеринарлық қызметтің зертханаларын пайдалану арқылы күн сайын ветеринарлық қызметтің 67 маманының қатысуымен 5200 сынақ өткізуге мүмкіндік бар. Осылайша, Ауыл шаруашылығы министрлігінің зертханалары есебінен Денсаулық сақтау министрлігі өңірлерде ПТР тестілеу жетіспеушілігін азайтуды жоспарлап отыр.

Алексей Цой сонымен бірге зерттеуге қатысқан 67 ветеринарлық зертхананың мамандары үшін жол жүру шығындарын төлеу республикалық бюджеттен қосымша 170 миллион теңге қажет ететіндігін ескертті.