Қазақстан мен Түркия құрама жүк тасымалын дамыту комитетін құрады

Қазақстан мен Түркия жүктерді халықаралық құрама тасымалдау туралы келісімді ратификациялауға дайындалуда. Бұл туралы ҚР Көлік министрлігінде хабарлады.

«Қазіргі уақытта біз құрама Транскаспий халықаралық көлік бағыты арқылы Қытайдан Еуропаға жүктерді жеткізу мерзімдерін қысқарту бойынша жұмыс жүргізіп жатырмыз. Оған теміржол, автомобиль және су көлігі қатысады. Қазірдің өзінде маршрут бойынша жүктерді өткізу және тауарларды жеткізу мерзімі 19-23 күнге дейін қысқартылды, оның ішінде 6 күн - Қазақстан аумағы бойынша. Бұл өткен жылмен салыстырғанда екі есе жылдам. Бұл келісім ТХКБ дамуына әсер етеді», - деді көлік вице-министрі Сатжан Аблалиев Парламент Сенатында келісімді ратификациялау туралы заң жобасын ұсынғанда.

Ол келісімді орындаудың барлық мәселелерін реттеу үшін тасымалдауды дамыту жөніндегі Бірлескен комитет құрылатынын айтты. Оның басты міндеті транзиттік тасымалдардың жылдамдығы мен сапасын арттыру болады.

Заң жобасы әртүрлі көлік түрлерін пайдалана отырып жүк тасымалдарын жеңілдетуге және Қазақстан мен Түркия арасындағы сауда-экономикалық ынтымақтастықты дамытуға бағытталған. Келісімді ратификациялау екі ел арасында автомобиль, теміржол және су көлігімен орындалатын жүктерді тасымалдау көлемін ұлғайтуға мүмкіндік береді.

Көлік министрінің орынбасарының айтуынша, құжат Каспий теңізінде тұрақты темір жол-паромдық операцияларды, мемлекеттерді қосатын темір жол желілерінде, атап айтқанда халықаралық контейнерлік блок-поездар үшін тиісті байланыстар мен транзиттік қызметтер көрсетуді көздейді, сондай-ақ кедендік ресімдеу ережелерін ескере отырып, екі ел арасында жүктерді тасымалдау шарттарын айқындайды.

Көлік министрлігінің мәліметінше, қазіргі уақытта Түркия келісімді ратификациялау бойынша жұмысты синхронды түрде жүргізуде.