Жамбыл облысында аграрийлердің 105 млн теңге субсидиясы ұрланды

Жамбыл облысының екі тұрғыны ауыл шаруашылығы техникасын сатып алу кезінде шығындарды субсидиялауға бөлінген 105,3 млн теңгені заңсыз алды. Бұл фактіні Рысқұлов ауданының прокуратурасы анықтады.

«Облыстың екі тұрғыны 108 шаруаның атынан құжаттарды қолдан жасап, 105,3 млн теңгені заңсыз алғаны анықталды», - деп хабарлады облыс прокуратурасының баспасөз қызметі. Ведомствоның мәліметінше, бұл қаражат агроөнеркәсіптік кешенді дамытудың 2017 - 2021 жылдарға арналған мемлекеттік бағдарламасы аясында бөлінген.

Алаяқтық фактісі бойынша 2024 жылғы 30 наурызда аудан прокуратурасы ҚР ҚК 190-бабы 4-бөлігінің 2-тармағы бойынша сотқа дейінгі іс жүргізуді тіркеді (бірнеше рет аса ірі мөлшерде жасалған алаяқтық). Осы бап бойынша жаза - мүлкі тәркіленіп, 5 жылдан 10 жылға дейінгі мерзімге бас бостандығынан айыру.

Қазіргі уақытта бұл іс бойынша тергеуді Экономикалық тергеу департаменті жүргізеді.