Ақсуда тамақ өнеркәсібі кәсіпорындары үшін инвестициялық аймақ құрылады

Ақсу-да көлемі 176 га инвестициялық аймақ құру бойынша жол картасы қабылданды, онда тамақ және жеңіл өнеркәсіп кәсіпорындары орналасады. Ақсу әкімдігі мен «Павлодар» ӘКК жобалау-сметалық құжаттаманы әзірлеу жұмыстарын жүргізуде. Бұл туралы Павлодар облысы әкімінің баспасөз қызметі хабарлады.

Өңір әкімі Асаин Байханов инвестициялық аймақтың құрылысы бойынша ЖСҚ әзірлеуді жеделдетуді және оны дамыту жөніндегі негізгі іс-шаралардың тізбесін екі апта мерзімде ұсынуды тапсырды.

Сондай-ақ, қалада «Сарыарқа» фермерлер базары салынуда. Бүгінгі таңда нысанға барлық инженерлік желілер тартылып, 40 жұмыс орны құрылды. Фермерлер базары осы жылдың қазан айында ашылады деп жоспарланған. Сонымен қатар, кәсіпкер өнімдерді сақтау және сұрыптау ғимаратын салуды жоспарлап отыр.

Облыс әкімі павлодарлық JAILAU үлгісі бойынша фермерлік базарлардың маңыздылығын атап өтті.

«Мен фермерлер базарларын ашудың үш негізгі критерийін анықтадым: делдалдарға жол бермеу және ауылшаруашылық өнімдерін тікелей өндірушілерден сату, жалдау бағасының төмендеуі және келісімшарт жасасу мерзімі кемінде 15 жыл», - деді аймақ басшысы.