Қазфосфатқа бағаны көтергені үшін 9,5 млн теңгеге айыппұл салынды

«Қазфосфат» компаниясы сұйық оттегінің бағасын көтергені үшін 9,5 млн теңге сомасына әкімшілік жауапкершілікке тартылды. Бұл туралы Бәсекелестікті қорғау және дамыту агенттігінің баспасөз қызметі хабарлады.

Компанияға қатысты тергеуді тұтынушылар өтініш білдіргеннен кейін БҚДА департаменті жүргізді.

«Осы кәсіпорынның қызметін талдау барысында сұйық оттегінің монополиялық жоғары бағасын белгілеуге байланысты монополияға қарсы заңнаманы бұзу фактілері анықталды. Бұл факт бәсекелестік нарық негіздерін бұзу болып табылады және Қазақстан Республикасы тұтынушыларының мүдделеріне қайшы келеді», - деп хабарлады БҚДА.

Тергеу нәтижелері бойынша Тараздың әкімшілік құқық бұзушылық жөніндегі мамандандырылған сотының қаулысымен «Қазфосфат» әкімшілік құқық бұзушылық туралы Кодекстің 159-бабының 3-бөлігіне сәйкес (Нарық субъектілерінің монополиялық жоғары бағаларды орнату және қолдау арқылы өздерінің үстем немесе монополиялық жағдайын теріс пайдалануы) әкімшілік жауаптылыққа тартылды. Кәсіпорынға 1,2 млн теңге көлемінде әкімшілік айыппұл салынды және 8,3 млн теңге сомасына монополиялық табыс тәркіленді.

БҚДА ақпараты бойынша, сот шешімі заңды күшіне енді, айыппұл толық көлемде төленді.

«Қазфосфат» ЖШС - ТМД және Еуропа аумағында құрамында фосфор бар тыңайтқыштар мен жемшөп фосфаттарын өндіретін ірі компаниялардың бірі. Компанияның өнімдері Еуропа, ТМД және Орталық Азия елдерінің нарықтарына жеткізіледі.