Су тасқынынан зардап шеккен атыраулық фермерлер өтемақы алған жоқ

Өткен көктемде жаппай су тасқыны салдарынан мүлкінен айырылған Атырау облысының кейбір фермерлері әлі күнге дейін өтемақы алған жоқ. Олар бұл мәселе туралы Мәжілістің Respublika партиясы фракциясының депутаты Айтуар Қошмамбетовпен кездесуінде мәлімдеді, деп хабарлады Мәжілістің баспасөз қызметі.

Көктемде аймақта ғимараттарды су басты, жабдықтар зардап шекті. Су әлі де кейбір жайылымдар мен егістіктердің аумағында тұр, сондықтан шаруашылықтарда мал азығын өсіруге мүмкіндік жоқ. Басты мәселелердің бірі - жоғалған мүлік үшін өтемақының болмауы. Олардың қатарында малға арналған қоралар, малшыларға арналған үйлер, бақшаларды суаруға арналған жабдықтар және басқалар бар. Мәселе көптеген ғимараттардың заңдастырылмағандығымен күрделене түседі.

«Су тасқынынан зардап шеккен өңірлердің мәселелері тұрақты бақылауда. Мемлекет басшысы барлық зардап шеккендерге жоғалған мүлкінің орнын толтыру міндетін қойды. Бірақ, өздеріңіз білетіндей, бюджет мүмкіндіктері шексіз емес және барлық мәселелер бекітілген алгоритмдер шеңберінде шешіледі. Алайда, тәжірибе көрсеткендей, өмір жаңа қиындықтар тудырады. Ережеде қарастырылмаған мәселелер қаралуы тиіс», - деп атап өтті Айтуар Қошмамбетов.

Кездесуде қалалық кәсіпкерлік және ауыл шаруашылығы бөлімі бастығының орынбасары Алтынай Сәрсенқызы мемлекет жеміс ағаштары үшін, жоғалған тіркелген мал үшін орта есеппен 15 мың теңге төлем қарастырғанын түсіндірді. Егер жануарларға арналған құжаттар болмаса, көршілердің куәлігі арқылы растау механизмі де қарастырылған.

Бұған дейін Атырау облысында 100-ге жуық шаруа қожалығы су астында қалғаны хабарланған болатын.