Қазақстанда ауылшаруашылық техникасын лизингке алу кезінде цифрлық теңгені қолдану басталды

ҚазАгроҚаржы инвестициялық субсидиялардың игерілуін бақылау үшін цифрлық теңгені пайдалану жөніндегі пилоттық жобаға қатысады. Жоба аясында Ақмола облысынан келген фермер жеңілдетілген мөлшерлеме бойынша ауыл шаруашылығы техникасын лизингке алды, деп хабарлады ҚазАгроҚаржы баспасөз қызметі.

«Астықжан К Т» ЖШС 5% жеңілдікті мөлшерлеме бойынша лизингке дәнді сепкіш-культиватор мен айналмалы шөп шабатын машина сатып алды. Шарттың сомасы 7,7 млн теңгені құрады. Аванстық жарна цифрлық теңгенің көмегімен мемлекеттік қаражат есебінен төленді.

«Цифрлық теңгенің басты артықшылықтарының бірі арнайы шоттарға қаражатты алдын ала аудару қажеттілігін жою болып табылады. Сонымен қатар, жаңа механизм алдын-ала төлемдерді бақылауды автоматтандырады. Жүйе лизинг шартын жасасу қорытындылары бойынша қаржы институтының атына қажетті соманы автоматты түрде жіберуді қамтамасыз ететін болады. Бұл қателіктер мен түсініспеушіліктерді болдырмайды, сондай-ақ барлық қаржылық операциялардың ашықтығын арттырады», - деді «ҚазАгроҚаржы» АҚ басқарма төрағасының орынбасары Марс Әліш.

ҚАҚ-да цифрлық теңге қолма-қол ақша мен қолма-қол ақшасыз есеп айырысудың артықшылықтарын біріктірген Қазақстанның ұлттық валютасының үшінші нысаны ретінде қарастырылатынын атап өтті. Мысалы, цифрлық теңгемен төлемдер жүргізу үшін интернет қажет емес. Сондай-ақ, блокчейн технологиясының көмегімен деректерді қорғаудың жоғары деңгейі және барлық операциялардың ашықтығы қамтамасыз етіледі. Бұл бюджет қаражатының ағынын бақылауға мүмкіндік береді.

2024 жылғы ақпанда Үкіметтің кеңейтілген отырысында президент цифрлық теңгенің көмегімен ақшаны таңбалау және қадағалау жөніндегі жобаларды кеңейтуді тапсырды. Бюджет қаражатын игеру үдерістерінде «ақшаны бояу» тетігін енгізу сыбайлас жемқорлыққа қарсы саясат тұжырымдамасына енгізілді.