Ауыл шаруашылығы министрлігі фермерлерді инвестициялық субсидиялауды кеңейтті
Қазақстанда 1 наурыздан бастап жаңа бағыттар бойынша мемлекеттік қолдауды көздейтін Агроөнеркәсіптік кешен субъектілерін инвестициялық субсидиялау қағидаларына өзгерістер күшіне енеді. Бұл туралы Ауыл шаруашылығы министрлігінің баспасөз қызметі хабарлады.
Импортталған ауылшаруашылық техникасын 2024 жылдың 26 мамырына дейін сатып алған фермерлерге субсидиялау қайта басталады. Аграрийлер астық және бұршақ дақылдарын себуге арналған сепкіштерді, егіс кешендерін, соқаларды, тырмаларды, қопсытқыштарды, тіркеме және аспалы орақтарды, пресс-жинағыштар мен шөп машиналарын қоса алғанда, агрегаттарды сатып алуға жұмсалған шығындардың 15%-ын өтей алады.
Сондай-ақ жылжымалы астық кептіргіштер мен егінді зиянкестерге қарсы өңдеу үшін қолданылатын дрондарды, орнатылған және тіркеме желдеткіш бүріккіштерді сатып алуға субсидиялар енгізілуде. Бұл шара астық шығынын азайтуға бағытталған.
Киіктердің ауылшаруашылық егістіктеріне зиян келтіретін жағдайларын болдырмау үшін қоршауға (түйінді торлар мен бағаналарға) инвестициялық субсидиялар қарастырылған. Қолдау осы мәселе өзекті болып табылатын облыстар әкімдіктерінің жергілікті бюджет қаражаты есебінен бөлінетін болады.
Бұдан басқа, құрғақ сүт және/немесе сүт сарысуын өндіруге арналған жабдыққа арналған шығындар субсидиялауға жатады. Қант зауыттарын салу және кеңейту кезіндегі шығындарды өтеу үлесі 25%-дан 40%-ға дейін ұлғайды.
Жұмыртқа және ет бағытындағы құс шаруашылығында асыл тұқымды репродукторды салу және кеңейту кезіндегі шығындарды өтеу үлесі 25%-дан 40%-ға дейін ұлғайтылды. Сондай-ақ тауық жұмыртқасын өңдейтін зауыттың құрылысы мен кеңейтілуін 40% пайыздық өтеммен субсидиялау бағдарламасы енгізілді.
«Бұл өзгерістер фермерлер мен Аграрлық кәсіпорындарға, әсіресе жабдықтар мен басқа да өндірістік ресурстарға бағаның өсуі жағдайында қаржылық жүктемені азайтуға, ауыл шаруашылығы өндірісінің өсуі мен жаңғыртылуын ынталандыруға, сондай-ақ оның ішкі және халықаралық нарықтардағы бәсекеге қабілеттілігін нығайтуға мүмкіндік береді», - деп атап өтті Ауыл шаруашылығы министрлігінде.