Алматы облысында жалған таңқурай көшеттеріне 474 млн теңге субсидия ұрланды

Алматы облысы Қарасай аудандық мәслихатының бұрынғы депутаты таңқурай көшеттерін сатып алуға бөлінген 474 млн теңге субсидияны заңсыз алды деп күдіктелуде. Облыстық ҚМА департаменті аса ірі мөлшердегі алаяқтық және қылмыстық кірістерді заңдастыру фактісі бойынша тергеу жүргізеді.

«Субсидияларды заңсыз алу мақсатында күдікті ауыл шаруашылығы басқармасына 947 млн теңге сомасына «Награда» элиталық сұрыптың таңқурай көшеттерін сатып алу туралы жалған құжаттарды ұсынды. Нәтижесінде ол заңсыз субсидия алған - 474 млн теңге мөлшерінде жұмсалған болжамды соманың 50%», - деп ҚМА баспасөз қызметі хабарлады.

Ведомствоның мәліметінше, күдікті бұл кірісті заңдастыру мақсатында 21 жеке кәсіпкермен көшеттерді орау, тиеу және түсіру жұмыстарын іс жүзінде орындамай жалған келісім-шарттар жасаған көп деңгейлі схема әзірлеген.

«Көрсетілген жалған шарттар мен төлем шоттарының негізінде 431 млн теңге сомасында ақшалай қаражат қолма-қол ақшаға алынды», - деп атап өтті ҚМА.

Бұдан басқа, ұрланған қаражатты заңды айналымға тарту мақсатында ол жұбайының атынан бағалы қағаздармен операциялар жүргізіп, 89 млн теңге сомасына қосымша қылмыстық табыс алғаны хабарланды.

Қылмыстық табыстарға ол Алматыда екі бөлмелі пәтер мен Toyota Highlander автокөлігін сатып алды.

Бұдан басқа, мемлекеттен ұрланған 170 млн теңгені күдікті Қонаевтағы казинода ұтылып қалды.

«Аталған мүлікке, сондай-ақ 50 млн теңге сомасындағы ақшалай қаражатқа және құны 91 млн теңге болатын бағалы қағаздарға тыйым салынды», - деп толықтырды баспасөз қызметі.

Соттың санкциясымен күдікті екі ай мерзімге қамауға алынды. Басқа ақпарат жариялауға жатпайды.