Қазақстанда шегірткеге қарсы күреске 7 млрд теңгеден астам қаржы бөлінді
2025 жылы табын шегіртке зиянкестерінің 2,1 млн гектар аумаққа таралуы күтілуде, бұл өткен жылмен салыстырғанда 1 млн гектарға аз. Шегірткелерге қарсы қорғаныс іс-шараларын жүргізуге республикалық бюджеттен 7,1 млрд теңге бөлінді. Бұл туралы ҚР Ауыл шаруашылығы министрлігінің баспасөз қызметі хабарлады.
Осы қаражат аясында 38 млн га жерге зерттеу жүргізу жоспарлануда. Жұмысқа 4342 адам тартылады, бұл өткен жылмен салыстырғанда екі есе көп.
Ауыл шаруашылығы министрлігінің мәліметінше, қазіргі уақытта қызметтерді кешенді сатып алу жүргізілуде, мердігер ұйымдармен келісімшарттар жасалды, өңдеуге 443 бірлік бүрку техникасы тартылатын болады.
Шегірткелердің көп таралуы байқалатын өңірлерде жергілікті жерлердегі жұмыстарды үйлестіру үшін облыс әкімдері орынбасарларының басшылығымен жедел штабтар құрылды.
Шегіртке зиянкестеріне қарсы қорғаныс шараларын тиімді ұйымдастыру үшін іс-шаралар жоспары мен Жол картасы әзірленді.
Қазіргі уақытта Түркістан және Жамбыл облыстарында шегірткеге қарсы күрес бойынша дайындық жұмыстары басталды.
Марокко шегірткесінің дернәсілдеріне мониторингтік зерттеулер жүргізу үшін Түркістан облысына Ақмола, Павлодар, Солтүстік Қазақстан, Қостанай, Қарағанды облыстары мен Абай облыстарының мамандары жіберіледі. Жалпы өңірлерге жүргізушілері бар 12 автомобиль және аудандық филиалдардың 20 басшысы мен мамандары жіберілетін болады.