С.Омаров президентке агроөнеркәсіптік кешенді дамытудың жаңа бағдарламасын дайындау туралы есеп берді

Ауыл шаруашылығы министрі Сапархан Омаров  Қазақстан Республикасының Президенті Қасым-Жомарт Тоқаевқа агроөнеркәсіптік кешенді дамытудың алдағы бес жылға арналған ұлттық жобасын дайындау барысы жайлы баяндады. Сонымен қатар, құс тұмауының өршуі себебі жайлы есеп берді. Бұл туралы Ақорданың баспасөз қызметі хабарлады.

«Агроөнеркәсіптік кешенді дамытудың ұлттық жобасын іске асыру ішкі нарықты әлеуметтік маңызы бар азық-түлік өнімдерімен қамтамасыз етуге мүмкіндік береді», - деп хабарлады баспасөз қызметі.

Сапархан Омаровтың айтуынша, алты өнім бойынша импортқа тәуелділік бар. Үкімет бекіткен жоспарларды жүзеге асыру арқылы үш жыл ішінде импортты отандық өнімге алмастыру мәселесін шешуге болады.

Министр сонымен бірге Қасым-Жомарт Тоқаевқа құс тұмауының өршу мәселесін тоқтату жайлы баяндады. Ауыл шаруашылығы министрлігінің хабарлауынша, вирустың таралуы толығымен тоқтатылған, құстардың өліміне байланысты өтемақы төлеу мәселесі тиісті басқарманың бақылауында.

Тақырыпқа байланысты оқу: Ауыл шаруашылық министрлігі АӨК-ті дамыту бойынша жаңа бағдарлама әзірлеуде

С.Омаров ағымдағы жылдың басынан бастап ауыл шаруашылығының жалпы өнімінің мөлшері 5% -ға өсіп, 4,4 трлн теңгені құрағанын, ал азық-түлік өндірісі 3,5% - артып,1,4 трлн теңгеге дейін көбейгенін айтты. Ауыл шаруашылығының негізгі капиталына және азық-түлік өндірісіне инвестициялар 15% -дан астамға өсті және жалпы сомасы 445 млрд теңгеден асты.

Кездесу соңында мемлекет басшысы Сапархан Омаровқа өңделген өнімдердің экспортын ұлғайтуға, ауыл шаруашылығындағы еңбек өнімділігін арттыруға, отандық фермерлерге тауарларын өткізетін орындар жасауға және ветеринария саласындағы бақылауды күшейтуге байланысты бірқатар тапсырмалар берді.