Агроөнеркәсіптік кешенді несиелендіруге қосымша 100 млрд. теңге бөлінді

Қазақстанның Ұлттық Банкі шағын және орта бизнеске жеңілдікпен несие беру бағдарламасына өзгерістер енгізді. 27 қазандағы шешіммен төтенше жағдайдың салдарынан зардап шеккен агроөнеркәсіптік кешендегі бизнес өкілдері мен кәсіпкерлерге несие беру үшін қосымша 200 миллиард теңге бөлінді.

Ұлттық банктің баспасөз қызметі хабарлағандай, бағдарлама 2021 жылдың 31 желтоқсанын қоса алғанда ұзартылды, ал ақшаны беру мерзімі 2021 жылдың 31 наурызына дейін созылады.

«Агроөнеркәсіптік кешенге жеңілдікпен берілетін несиенің 200 миллиард теңгесінің 100 миллиарды көлемінде лимит бөлінді, оның 70 миллиарды екінші деңгейлі банктер арқылы, ал 30 миллиард теңгесі -«Аграрлық несие корпорациясы» АҚ арқылы беріледі», - деді Ұлттық банк мамандары.

Тақырыпқа байланысты оқу: Үкімет егін егу және егістікті жинау жұмыстарына 70 млрд теңге көлемінде несие береді

Аталған бағдарламаға көп қатысушыларды қамту мақсатында оның атауы кәсіпкерлік субъектілеріне жеңілдікпен несие беру бағдарламасы болып өзгертілді.

Бағдарлама ағымдағы жылдың наурыз айында мемлекет басшысының тапсырмасымен қабылданды және төтенше жағдайдан зардап шеккен кәсіпкерлерді қолдауға бағытталған. Ағымдағы жылдың 18 қарашасындағы жағдай бойынша екінші деңгейлі банктер 567,4 млрд.теңгеге 2311 өтініш қабылдады. 1370 шағын және орта бизнес субъектілері (1168 ШОБ және 202 жеке кәсіпкер) 455,3 млрд.теңге сомасында несие алды, оның 101,6 млрд.теңгесі бұрын берілген несиелерді жабудан түскен ақшадан бөлінеді.