Қытайға қазақстандық зығырдың үлкен партиясы жеткізілді

Қытайдың Иньчуань қаласына (Қытайдың солтүстік-батысындағы Нинся-Хуэй автономиялық ауданының әкімшілік орталығы) Қазақстаннан 1767 тонна зығыр тұқымы жеткізілді. Жеткізу Қытай - Орталық Азия трансшекаралық жүк тасымалы аясында жүзеге асырылды, деп «Синьхуа» агенттігі жазды.

Зығыр тұқымдары жоғары сапалы өсімдік майына өңделеді, ол ай күнтізбесі бойынша дәстүрлі қытайлық Жаңа жыл мерекесі кезінде тұтынушылардың сұранысын қанағаттандыру үшін сатылымға шығарылады. Биыл мереке 17 ақпанға келеді.

Chinanews.com.cn интернет-порталының ақпараты бойынша, Қазақстаннан жеткізілген зығыр тұқымдарының ірі партиясы Қорғас БӨП арқылы шекарадан өткеннен кейін бонд режимінде Иньчуань теміржол логистикалық орталығының оңтүстік жүк паркіне жеткізілді. Ол жерден жүк дереу автокөлікпен қаланың кешенді бонд аймағына жеткізілді, онда зығыр тұқымдары өңделеді. Алынған тағамдық май Иньчуань қаласының және оған іргелес аудандардың базарларында сатылымға шығады.

Нинся-Хуэй АА зығыр тұқымын өңдеу және тұтыну бойынша Қытайдың негізгі аудандарының бірі болып табылады. Қытай - Орталық Азия жүк тасымалдарының теміржол бағыттарын іске қосу осы агроөнімді трансшекаралық жеткізуді арзанырақ және жылдам етті, сондай-ақ жергілікті АӨК кәсіпорындары үшін шикізатты тұрақты жеткізуді қамтамасыз етуге көмектесті.

Қазіргі уақытта Иньчуань теміржол логистикалық орталығы сүт, ұн және күріш, сондай-ақ жас көкөністер сияқты халықтың негізгі қажеттіліктеріне қатысты мереке алдындағы жеткізілімдерді қамтамасыз ету үшін барлық көлік ресурстарын жұмылдыруда.