Талдықорғанда майлы дақылдарды өңдейтін жаңа зауыт іске қосылды

Талдықорғанда май өңдейтін құны 4,4 миллиард теңгеге салынған зауыт іске қосылды. Бұл туралы ақпаратты Алматы облысы әкімінің баспасөз қызметінде хабарлады.

Зауыт тәулігіне 500 тонна рапс пен 400 тонна күнбағыс майын өндіретін болады, нәтижесінде өсімдік майы мен күнжара майы  өндіріледі. Бүгінде зауыт 100% шикізатпен қамтамасыз етілген.   

Мұнда германиялық қондырғылар орнатылып, алынған өнімнің сапасын жақсарту үшін майлы дақылдарды қайта өңдеудің экструзиялық технологиясы қолданылады. Дайын өнім жергілікті нарыққа және алдағы уақытта  Қытайға жіберілетін болады.

 Жобаның бірінші кезеңінде 50 шақты жұмыс орны пайда болды, болашақта толық іске қосылған соң, өндіріс әрі қарай кеңейіп, 500-ге дейін жұмыс орны ашылады деп күтілуде.

 Зауыттың ашылу салтанаты кезінде облыс әкімі Амандық Баталов мемлекет тарапынан қолдау көрсетілгенін мәлімдеді. Зауыт орналасқан өндірістік аймақ барлық қажетті инфрақұрылыммен қамтамасыз етілген.

«Қабылданған шаралардың арқасында өткен жылы аймақтағы өнеркәсіп өндірісінің көлемі 950 млрд. теңгені құраса  биыл 1 трлн. болады деген жоспар бар. Ауылшаруашылығының жалпы өнімі 846 млрд теңгеден  950 млрд.-қа дейін жетіп отыр. Мүмкін 1 триллионға дейін жеткіземіз, жыл сайын сұранысқа ие дақылдардың көлемін көбейтеміз.  Ашылып отырған майлы дақылдарды қайта өңдеу зауыты да іске өз үлесін қосады», — деді Баталов.

Өз кезегінде, жаңадан ашылған кәсіпорынның негізгі акционері Сергей Терещенко индустриалды аймақта бордақылау зауыты мен консерві зауытын құруды жоспарлап отырғанын мәлімдеді.