Мамыр айында қазақстандық 116 компания ұнды экспорттауға квота алды

Ауыл шаруашылығы министрлігі 2020 жылдың мамыр айында ұн экспортына квота алу үшін өтініш берушілердің тізімін жариялады.

АШМ  тізіміне 136 070,8 тонна ұн экспортына квота алған 116 компания кіреді. Қазақстан Республикасының ішкі нарығында кепілді түрде жеткізілетін  ұн мөлшері 40821,2 тоннаны құрайды. Квота алған өтініш берушілердің толық тізімімен АШМ сайтында танысуға болады.

 Естеріңізге сала кетейік, 561 244 тонна ұнды экспорттауға квота алу үшін 140 компания ниет білдіріп, өтініш берді.

Қазақстанда COVI-19 таратылуына байланысты ТЖ режимі енгізілгеннен кейін ұн мен басқа да өнім экспортына шектеулер енгізілді. Сәуір айында ұнды тиеп жөнелту үшін 70 мың тонна көлемінде квота бөлінді, мамыр айында ол 150 мың тоннаға дейін өсті. Аталған нарық қатысушыларының айтуынша, қабылданған шектеулердің нәтижесінде Қазақстанның диірмендерінде 300 мың тоннадан астам  ұн жиналып қалған еді.