Түркістандық аграршылар биылғы жаңа маусымда ТМД-ға мыңдаған тонна қарбыз экспорттады

Түркістан облысы Мақтаарал ауданының дихандары ТМД елдеріне мың тонна қарбыз бен 20 тонна қауын экспорттады. Бұл туралы Өңірлік коммуникациялар қызметінен хабарлады.

«Шаруа қожалықтары жаңа маусымда алғашқы бақша дақылдарын экспортқа сатты. Атап айтқанда, ТМД елдеріне 1000 тонна қарбыз және 20 тонна қауын жіберілді», - деді Мақтаарал ауданының ауыл шаруашылығы бөлімінің бастығы Ғалым Дүйсенбеков.

Аталған аймақта облыс әкімі Өмірзақ Шөкеевтің бір егіс алқабынан 2-3 түрлі дақыл алу міндеті табысты түрде жүзеге асырылуда. Атап айтсақ, Жамбыл ауылдық округі Жалын ауылында орналасқан «Жорабек» шаруа қожалығы Беларуссияға ерте піскен өнімдерін экспорттайды. Шаруа қожалығының жетекшісі Райымбек Қалдыбаев 60 күннен кейін жеміс беретін «Долбы» қарбызын отырғызған болатын. Қазіргі кезде ол 25 тонна өнімді шетелге жіберуді жоспарлап отыр. Ал жиналған өнімнің орнына жемшөп дақылдары себіледі.

Жалпы, биыл облыста 10 667,3 га бақша дақылдары егілді. Оның ішінде пленка астында өсірілген қауындар 3535,7 га, ал ашық жерге отырғызылған қауындар - 5867,6 га. Пленка қарбыздарының ауданы 831 га, ал ашық жердегі - 433 га.

Айта кету керек, 2019 жылы Мақтаарал ауданында шамамен 300 мың тонна қауын  өсірілді. Ауыл шаруашылығының жалпы өнімінің көлемі 12 айда 44,9 млрд. теңгені құрады.