Қазақстанға РФ мен Вьетнамнан жеткізілген өсімдік өнімдерін кіргізбеді
2020 жылдың 24 ақпан 3 наурыз аралығында ҚР АШМ өсімдік карантині жөніндегі мемлекеттік инспекторлары Ресей Федерациясы мен Вьетнам мемлекетінен жоғары фитосанитарлық қауіп-қатері бар өсімдік өнімдерін заңсыз алып келудің жолын кесті, деп хабарлады Ауыл шаруашылығы министрлігінің баспасөз қызметі.
Хабарламада айтылғандай, карантиндік бақылау барысында инспекторлар 76 тоннадан астам картоп, 55 тоннадан астам жеміс-жидек және көкөніс түрлерін, 19 тоннаға жуық банан, 2 мың гүл және 600 дана гүл көшеттерін, сондай-ақ Вьетнамнан 25 тоннаға жуық кешью жаңғағын фитосанитарлық сертификатсыз алып өтпек болғандарын анықтады.
Өсімдіктер карантині саласындағы заңнамалардың талаптарына сәйкес, аталған өнімдер Қазақстан Республикасы аумағына тасымалдауға тыйым салынған. Кінәлі тұлғалар әкімшілік жауапкершілікке тартылды.
Еске сала кетейік, ҚР Ауыл шаруашылығы министрлігі мен Россельхознадзордың 2020 жылғы бірлескен жұмысының нәтижесі бойынша Қазақстан-Ресей шекарасында фитосанитарлық бақылау күшейтілді.