Ақмола облысында ауыл шаруашылық техникасын жасайтын жаңа өндіріс іске қосылды

Ақмола облысында ауыл шаруашылық техникаларын шығаратын зауыт жұмыс істей бастады. Бұл туралы KAZAKH INVEST ұлттық компаниясының баспасөз қызметі хабарлады.

Аталған жобаны KAZAKH  компаниясының қолдауымен Kazrost Engineering Ltd (Georgian Industrial Group еншілес кәсіпорны) жүзеге асырды. Жобаға салынған жалпы инвестиция көлемі 60 миллион долларды құрады.

Ресейлік ауыл шаруашылық техникаларын өндіретін “Kз Ростсельмаш” лицензиялық келісімнің негізінде қазақстандық компания қазірдің өзінде 220 комбайн, 155 орайтын техника және 92 тиегіш шығарды. Зауыттың қуаттылығын жылына 425 бірлікке дейін арттыру жоспарлануда, оның 10%-ы экспортталады. Жобаны іске асыру нәтижесінде 150 жаңа жұмыс орны ашылды.

Мамандардың айтуынша, бүгінде Қазақстандағы ауыл шаруашылық техникаларының  тозуы орташа есеппен 76%-ды құрайды. Мұндай техникаларды жаңарту көбінесе импорт есебінен жүзеге асырылады. Жылдық импорттың еліміздегі үлесі 9-дан 1-ге жетеді, яғни құрал-жабдықтардың 90% -ы импорттық техникалар.

«Бұл жобаны іске асыру фермерлердің шетелден қымбат құрал-жабдықтарды сатып алу шығындарын айтарлықтай азайтады. Өндіруші қазірдің өзінде фермерлерді қолдау бойынша түрлі мемлекеттік бағдарламаларға қатысуда. Соның ішінде мемлекет қаржыландыратын «Агротехника» бағдарламасы да бар. Сонымен бірге мемлекет ауыл шаруашылық техникасын сатып алуға 20-25% көлемінде инвестициялық субсидия ұсынады», - деді KAZAKH INVEST басқарушы директоры Ұлбосын Сарыбаева.

Georgian Industrial Group - бұл Грузиядағы әр түрлі бизнес-портфелін иемденген компания, соның ішінде көмір өндіру, энергия өндірісі бар ірі өнеркәсіптік холдинг. Компанияның ТМД және алыс шетелдерде өкілдіктері жұмыс істейді.

Еске сала кетсек, Қазақстанда ауыл шаруашылық техника шығару  жарты жыл ішінде 125% -ға артты.