Қожаназаров үкіметті техниканы лизингке беру бағдарламасына байланысты сынға алды

Үкімет ауыл шаруашылығы техникасын лизингке берудің жаңа жеңілдікті бағдарламасын іске қосуды кейінге қалдырды, ал аграрийлер егіс басталғанға дейін техниканы жаңартуға үлгермейді. Бұл туралы бүгін Мәжілістегі Үкімет сағатында депутат, Respublica партиясының төрағасы Айдарбек Қожаназаров мәлімдеді.

Партия ағымдағы жылдың ақпан айында ҚР Президенті Қасым-Жомарт Тоқаев ауыл шаруашылығы техникасының жеңілдетілген лизингінің көлемін жыл сайын 450 млрд теңгеге дейін, оның ішінде ағымдағы жылға - 100 млрд теңгеге арттыруды тапсырғанын еске салды. Наурызда премьер-министр 1 мамырға дейін түпкілікті қарыз алушы үшін 5%-дан аспайтын мөлшерлеме бойынша ауыл шаруашылығы техникасының жеңілдікті лизингін қаржыландыру үшін қаражат бөлуді тапсырды.

Бірақ әзірге фермерлер егін егу жұмыстарын ескі техникамен жүргізуге мәжбүр. Сонымен қатар, елдің оңтүстігінде егіс қарқынды жүріп жатыр, солтүстік аймақтарда жұмыс 10 күннен кейін басталады.

«Үкімет жеңілдетілген техника лизингін қаржыландыру туралы шешіміне кешігіп келді. Фермерлердің ескі техниканы жаңартуға мүмкіндігі жоқ. 22,5% мөлшерлеме және 15% аванстық төлеммен қазіргі шарттар қолжетімсіз. Бұл қаржыны фермерлер тым болмаса биыл ала ма, жоқ па, белгісіз. Жеңілдетілген техникаларды жаңарту бағдарламаларына қаражат бөлуді кейінге қалдыру агроөнеркәсіптік кешендегі кезекті дағдарысқа әкеледі. Бұл қарқынмен ауыл шаруашылығы техникасының жыл сайынғы жаңаруын 8-10 пайызға жеткізе алмаймыз», - деді Айдарбек Қожаназаров.

Ол жауапты мемлекеттік органдар арасында үйлестірілген жұмыс жоқ екенін атап өтті.

Мұндай асықпау «қоймада» жұмыс істеуге мәжбүр болған техника шығаратын зауыттардың қызметіне де кері әсерін тигізеді. Бүгінде отандық өндірушілерде ел экономикасында жұмыс істемейтін 2 676 бірлік техника бар.