Қазгидромет бидай мен күнбағыстың жоғары өнімділігін болжайды

Қазгидромет жаздық бидай мен күнбағыс өнімділігінің болжамына түсініктеме берді.

Болжамға сәйкес, жаздық бидайдың өнімділігі республиканың солтүстік жартысында негізінен орташа көп жылдық мәнге жуық, ал Батыс Қазақстан мен Ақтөбе облыстарының басым бөлігінде орташадан жоғары болады деп күтілуде.

Бидай өнімділігі нормадан жоғары Солтүстік Қазақстан облысының Жамбыл, Қызылжар және Аққайың аудандарында, Қостанай облысының Қамысты ауданында, Катонқарағай және Шығыс Қазақстан облысының Алтай ауданында күтіледі.

Қазгидрометтің ақпараты бойынша, жаздық бидайдың болжамды шығымдылығы Қостанай облысы бойынша орта есеппен 10,6 - 12,6 ц/га, СҚО бойынша 14,5 - 16,5 ц/га, Ақмола облысы бойынша 9,3 - 11,3 ц/га, Павлодар облысы бойынша 8,1 - 10,1 ц/га, Қарағанды облысы бойынша 8,6 - 10,6 ц/га, ШҚО 12,6 - 14,6 ц/га, Ақтөбе облысы 8,3 - 10,3 ц/га, БҚО 7,8-9,8 ц/га.

Қостанай және Павлодар облыстарында күнбағыстың шығымдылығы орташа көп жылдық мәнге жуық, ал Шығыс Қазақстан облысында орташа көп жылдық мәндерден жоғары болады деп күтілуде.

Күнбағыстың болжамды шығымдылығы Қостанай облысы бойынша орта есеппен 5,8 – 7,8 ц/га, Павлодар облысы бойынша 4,3 – 6,3 ц/га, ШҚО - 13,5– 15,5 га құрайды.