Қазақстанға бидай әкелуге тыйым салу 12 қазанға дейін ұзартылды

Бидайды Қазақстанға, оның ішінде ЕАЭО-ға мүше мемлекеттерден автомобиль, су және темір жол көлігімен әкелуге тыйым салу белгіленді. Тыйым салу туралы 2024 жылғы 11 сәуірдегі №125 бұйрыққа ауыл шаруашылығы министрі қол қойды.

Ауыл шаруашылығы министрлігінің мәліметінше, уақытша тыйым салу 2024 жылғы 12 сәуірден бастап 6 ай мерзімге қолданылады.

Тыйым Қазақстан аумағы арқылы бидайды темір жол көлігімен транзиттік тасымалдауға, сондай-ақ ұн тарту және құс шаруашылығы кәсіпорындары үшін бидай әкелуге қолданылмайды. Әкелінген бидайды ішкі және сыртқы нарықтарда сатуға болмайды, деп толықтырды АШМ.

Естеріңізге сала кетейік, ресейлік бидайды автокөлікпен әкелуге тыйым салуды Қазақстан 2023 жылғы 10 сәуірде жарты жыл мерзімге енгізген болатын. Мұның себебі контрабандалық жүктер ағынында. Осыдан кейін, 2023 жылдың қазан айында тыйым ұзартылды, сонымен қатар құс фабрикалары, ұн тарту компаниялары мен лицензияланған элеваторларды қоспағанда, теміржол арқылы әкелуге тыйым салынды.