Қазақстанда 24 млн тоннадан астам астық бастырылды

Бүгінгі таңда Қазақстанда 15,8 млн гектардан астам дәнді және бұршақты дақылдар жиналды. Орташа өнімділігі гектардан 15,2 ц болған кезде 24,1 млн тоннадан астам астық бастырылды. Бұл туралы Ауыл шаруашылығы министрлігінің баспасөз қызметі хабарлады.

Бидай 12,7 млн га алқапта жиналды, өнімділігі гектардан 14,5 ц болған кезде 18,4 млн тонна бастырылды; арпа - 2,1 млн га, өнімділігі гектардан 17,1 ц болған кезде 3,6 млн тонна бастырылды; сұлы - 177 мың га, өнімділігі гектардан 16,5 ц болған кезде 292,2 мың тонна бастырылды.

Майлы дақылдар 958,7 мың га алқаптан жиналды, орташа өнімділігі гектардан 11,1 ц болған кезде 1 млн тоннадан астам бастырылды.

Сонымен қатар, 112 мың гектар алқаптан өнімділігі гектардан 232,5 ц болған кезде шамамен 2,6 млн тонна картоп жиналды, көкөніс дақылдары 108,1 мың гектардан 273,3 ц өнімділікте 2,9 млн тоннадан астам жиналды.

Бақша дақылдары 98,1 мың га алқаптан жиналды, өнімділігі гектардан 263,9 ц, жалпы алым 2,6 млн тоннадан асты.

АШМ деректері бойынша егін жинау науқанына 149,9 мың трактор, 37,6 мың астық жинайтын комбайн, 14,9 мың дестелегіш және 195 мың басқа техника жұмылдырылған.