Қазақстан 9,3 млн тонна астық экспорттады

«Қазақстан темір жолы» ҰК деректері бойынша, 2024 жылғы қыркүйектен бастап 2025 жылғы 10 шілдеге дейін Қазақстаннан астық экспортының көлемі 9,3 млн тоннаны құрады, бұл 2023-2024 жылдардағы ұқсас кезеңмен салыстырғанда 58,4%-ға артық. Бұл туралы ҚР Ауыл шаруашылығы министрлігінің баспасөз қызметі хабарлады.

Экспорттың негізгі бағыттары: Өзбекстан - 3,4 млн тонна (+32,8%), Тәжікстан - 1,3 млн тонна (+45,8%), Ауғанстан - 309 мың тонна (+49,2%), Қырғызстан - 238 мың тонна (+96%), Иран - 974 мың тонна (17,5 есе өсім), Әзірбайжан - 713 мың тонна (өсім 118,8 есе).

«Экспорт көлемінің өсуі сыртқы нарықтардағы қазақстандық астықтың жоғары сұранысын растайды және жеткізу географиясын кеңейту және логистикалық инфрақұрылымды жаңғырту бойынша жүзеге асырылып жатқан шаралардың тиімділігін көрсетеді», - деп атап өтті АШМ.