АШМ астықты қайта өңдеуді дамытудың жол картасын әзірлейтін болады

Бүгін үкімет отырысында Премьер-министр Асқар Мамин Ауыл шаруашылығы министрлігіне астық пен бұршақ тұқымдас дақылдарды өңдеу мен экспорттауды дамыту бойынша бірқатар тапсырмалар берді.

А.Маминнің айтуынша, жаңа астықтың экспорттық әлеуеті шамамен 7,5 - 8 миллион тоннаны құрайды, бұл өткен жылғы деңгейден кемінде 12,5% жоғары.

«Әлемдегі жағдай бойынша азық-түлікке сұраныс пен баға тек өсетіндігін көрсетеді. Сондықтан біздің басты міндетіміз - астықты қайта өңдеу өнімдерінің өндірісі мен экспортын  арттыру. Бізде астықты терең өңдеудің, атап айтқанда, глютен, крахмал және биоэтанол өндірісінің жақсы үлгілері бар. Жалпы, астық пен өңделген өнімдердің экспорттық әлеуеті өте зор және біз оны барынша арттыруымыз керек», - деп атап өтті Премьер-Министр.

Үкімет басшысы Ауыл шаруашылығы министрлігіне астық және бұршақ дақылдарын өңдеу өнеркәсібін дамыту және экспорттық әлеуетті арттыру бойынша Жол картасын әзірлеуді тапсырды.

Сонымен қатар, әкімдіктер мен Ауыл шаруашылығы министрлігіне астықты сатып алу бағасын белгілеу және нарық қатысушыларына ақпарат беру, сондай-ақ форвардтық сатып алу тетігі аясында қаражаттың қайтарылуын қамтамасыз ету тапсырылды.

Үкімет басшысы Өнеркәсіп министрлігіне ҚТЖ –мен бірлесіп астықты үздіксіз тасымалдау үшін вагондармен қамтамасыз ету жөнінде тиісті шаралар қабылдауды тапсырды.