Құрама жем өндірісін СҚО-да қытайлық инвестор іске қоспақ

Xian AiJu cereals Oil Industry Group Co., Ltd. (AiJu) Қытай компаниясы Солтүстік Қазақстан облысында қуаты 300 мың тонна құрама жем өндіретін зауыт салады. Бұл туралы Kazakh Invest ұлттық компаниясы хабарлайды.

Ұлттық компания AiJu-мен бизнес-делегацияның Шэньси провинциясынан Солтүстік Қазақстан облысына сапары кезінде өзара түсіністік туралы меморандум жасасты. Зауытты іске қосу жобасы жыл ішінде іске асырылады деп жоспарлануда. Инвестиция сомасы $16 млн құрайды. Кәсіпорында 50 тұрақты жұмыс орны құрылады.

Зауыт ІҚМ, ұсақ мал және құс үшін құрама жем өндірумен ауыл шаруашылығы өнімдерін өңдеумен айналысатын болады. Кәсіпорынның жұмысы жергілікті ауыл шаруашылығы өндірушілерінің өнімдерін сатуға қосымша мүмкіндік береді.

"AiJu компаниясы 2016 жылдан бері Қазақстанда жұмыс істеп келеді, ел экономикасына 9,4 млрд теңгеден астам қаржы салды. Қытайлық инвесторлар бұған дейін бір жобаны – Солтүстік Қазақстан облысының Тайынша ауданында өсімдік майын өндіретін зауыт салуды жүзеге асырған болатын, енді Қазақстандағы қызметті кеңейтуді жоспарлап отыр. Бұл жоба Қытай мен Қазақстан арасындағы ауыл шаруашылығы және ауыл шаруашылығы өнімдерін қайта өңдеу саласындағы ұзақ мерзімді әріптестіктің тағы бір дәлелі болып табылады", - деді KAZAKH INVEST өңірлік өкілі Данияр Шалабаев.

Компания өнімді жергілікті нарықта сатуды, аймақтағы құрама жемге деген жоғары сұранысты қанағаттандыруды және жақын елдерге экспорттауды жоспарлап отыр.