QazBioPharm Boehringer Ingelheim компаниясымен аусылға қарсы вакциналар шығару туралы келісімге қол қойды

Аусылға қарсы вакциналарды өндіру туралы келісімге Парижде QazBioPharm Ұлттық холдингінің бас директоры Ерғали Абдурайымов және француздық Boehringer Ingelheim компаниясының президенті Кристиана Вайзен қол қойды. Бұл туралы ҚР Сыртқы істер министрлігінде хабарлады.

Лицензиялық келісімге сәйкес француздық Boehringer Ingelheim Animal Health France компаниясы Дүниежүзілік жануарлар денсаулығы ұйымының стандарттары бойынша аусылға қарсы жоғары сапалы вакциналар өндірісін дамыту және оны толығымен жою мақсатында QazBioPharm үшін өз ресурстары мен тәжірибесін ұсынады.

Ведомство бұл Қазақстандағы жануарлардың жұқпалы ауруларымен күресті нығайтуға ықпал ететінін және болашақта қазақстандық ет өнімдерін шетелдік нарықтарға экспорттауға мүмкіндік беретінін атап өтті. Аусылға қарсы вакцинация Үкіметтің аурумен күресу жоспарларының негізгі құрамдас бөліктерінің бірі болып табылады.

Осы Келісімге қол қою Франция президенті Эмманюэль Макронның 2023 жылғы қарашадағы Астанаға ресми сапары барысында қол жеткізілген уағдаластықтардың жалғасы болып табылады.

Boehringer Ingelheim әлемдегі ең үздік 20 фармацевтикалық компанияның қатарына кіреді және бүкіл әлемде орналасқан 142 өкілдіктен тұрады. Компания аусылға қарсы вакцина штаммдарының кең портфолиосына ие және Еуропалық фармацевтика өнеркәсібі федерациясы мен қауымдастықтарының (EFPIA) толық мүшесі болып табылады.