Қазақстанның мал өсірушілерін 50 млрд теңгеге қаржыландырады
Қазақстанның Ауыл шаруашылығы министрлігі «Бәйтерек» ҰБХ-мен бірлесіп, мал шаруашылығы шаруашылықтарына, бірінші кезекте бордақылау алаңдарына жылдық 5% мөлшерлемемен жеңілдікпен несие берудің жаңа бағдарламасын іске қосуды жоспарлап отыр. Аталған мақсаттарға 50 млрд теңге бағытталады, деп Ауыл шаруашылығы министрлігінің баспасөз қызметі хабарлады.
Қарыздардың қолжетімділігін арттыру үшін «Даму» Қоры арқылы кепілдік беру тетігін іске қосу жоспарлануда.
Ауыл шаруашылығы министрлігі алқасының кеңейтілген отырысында АӨК-ні жеңілдетілген несиелеу мәселелері бойынша көктемгі егіс және егін жинау жұмыстарын нестелеу шеңберінде 468,2 млрд теңгеге 7230 ауыл шаруашылығы өндірушісі қаржыландырылғаны, 7,5 млн га егіс алқабы қамтылғаны атап өтілді. «Даму» КДҚ кепілдік беру бағдарламасы аясында 212,8 млрд теңге сомасына 1226 кепілдік берілді.
«Жеңілдікті лизинг» бағдарламасы бойынша аграрийлердің техникалық паркін жаңарту үшін 2025 жылы 250 млрд теңге қарастырылған, бұл ауыл шаруашылығы техникасының кемінде 6 мың бірлігін сатып алуға мүмкіндік береді. Өтінімдерді қабылдау басталған сәттен бастап 24 ақпанда 140,1 млрд теңгеге 3640 өтінім берілді.
Бұдан басқа, қайта өңдеу саласын қолдау үшін қайта өңдеушілердің айналым капиталын толықтыруға кредиттік қаражатты жылдық 5%-ға дейін арзандатуға мүмкіндік беретін қаржы институттарын субсидиялау тетігі енгізілді. Аграрлық несие корпорациясы арқылы осы мақсаттарға 44 млрд теңгеден астам қаражат жұмсалады.
«Барлық күш-жігер аграрлық саланы қолжетімді қаржыландыруды, тұрақты өсуді және технологиялық жаңартуды қамтамасыз етуге бағытталуы тиіс. Жеңілдетілген несиелеу нақты нәтижеге — ауыл шаруашылығының өнімділігін, экспорттық әлеуетін арттыруға жұмыс істеуі тиіс», - деді ауыл шаруашылығы министрі Айдарбек Сапаров.
Алқа қорытындысы бойынша «Бәйтерек» ҰБХ және АНК-мен бірлесіп мал шаруашылығын жеңілдікпен қаржыландыруды іске қосу мәселелерін пысықтау тапсырылды. Сондай-ақ, «Кең дала-2» бағдарламасына жылыжайлар мен жеміс бақтарын қаржыландыру бағыттары енгізіледі.
Бұдан басқа, қаражатты қайтаруды және қарыздардың нысаналы пайдаланылуын бақылауды қамтамасыз ету тапсырылды.