Түркістан облысында ірі бордақылау алаңдарының кластері құрылуда

Түркістан облысының Сауран ауданында ірі бордақылау алаңдарының кластерін құру бойынша агроиндустриалды жоба жүзеге асырылуда. Жобаға салынған инвестициялардың жалпы көлемі 5 млрд теңгені құрайды. Бұл туралы ҚР Ауыл шаруашылығы министрлігінің баспасөз қызметі хабарлады.

Қаражаттың негізгі бөлігі құрылыс-монтаждау жұмыстарына, инженерлік коммуникацияларды жүргізуге және жем-шөп қорын қалыптастыруға бағытталғаны атап өтілді.

“Жобаның негізгі ерекшелігі 185 гектар аумақта 292 бордақылау алаңын шоғырландыру болып табылады, бұл инфрақұрылымды тиімді пайдалануға, шығындарды оңтайландыруға және өндірісті орталықтандыруға мүмкіндік береді", - деп АШМ хабарлады.

Қазіргі уақытта Сауран ауданының Ескі Иқан ауылдық округінде 20 га алаңда малға арналған 30 бордақылау алаңы салынуда, оның 25-де құрылыс жұмыстары басталды. Бұл нысандарда жалпы 15 мың ірі қара мал бордақылау жоспарлануда.

Жоба шеңберінде мал шаруашылығы өнімдерін қайта өңдеу бойынша толық өндірістік цикл құру көзделген. Ол үшін қазіргі заманғы сою пунктінің құрылысына ауданы 1,5 га учаске бөлінді, бұл ет өнімдерін жоғары стандарттарға сәйкес бастапқы өңдеу, сақтау және тасымалдау үшін қажетті инфрақұрылымды қамтамасыз етеді.

Жобаның негізгі артықшылықтары бордақылау шаруашылықтарын шоғырландыру есебінен өндірістік процестерді оңтайландыру, логистика мен басқаруды жеңілдету, сондай-ақ орталықтандырылған ветеринарлық және санитарлық бақылау болып табылады.

“Жобаны іске асыру өңірде етті мал шаруашылығын айтарлықтай дамытуға, ішкі нарықты сапалы отандық өніммен қамтамасыз етуге және Қазақстанның экспорттық әлеуетін арттыруға мүмкіндік береді", - деп атап өтті Ауыл шаруашылығы министрлігінде.