Қазақстанда аналық мал басын әкетуге тыйым салу ұзартылады
Қазақстанда Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның шешімі бойынша енгізілген ІҚМ және ұсақ аналық мал басын әкетуге тыйым салу ұзартылады. Тиісті бірлескен бұйрықты Ауыл шаруашылығы министрлігі мен Қаржы министрлігі дайындады.
«Бірлескен бұйрықтың жобасында ҚР аумағынан ірі қара малдың аналық басын (Еуразиялық экономикалық одақтың сыртқы экономикалық қызметінің бірыңғай тауар номенклатурасының коды 0102) және ұсақ малдың аналық басын (Еуразиялық экономикалық одақтың сыртқы экономикалық қызметінің бірыңғай тауар номенклатурасының коды 0104) әкетуге алты ай мерзімге тыйым салу көзделген», - деп Ауыл шаруашылығы министрлігі хабарлады.
Бұл шешім малдың жаппай шығарылуын болдырмау, сондай-ақ отандық өңдеу кәсіпорындарының жүктемесін қамтамасыз ету мақсатында қабылданды.
Естеріңізге сала кетейік, қазіргі уақытта елде бұқашықтарды 30 қыркүйекті қоса алғанда әкетуге тыйым салынған.
Ауыл шаруашылығы министрлігінің мәліметінше, елімізде мал әкетуге қолданыстағы шектеулер болған кезде ет экспорты өсуде. Қаңтардан мамырға дейін Қазақстан 12,3 мың тонна сиыр етін экспорттады, бұл өткен жылдың сәйкес кезеңінен 2,4 есе көп. Қой етінің экспорты 2,6 есе өсіп, 9,2 мың тоннаға жетті.