Түркістан облысында құны 53,7 млрд теңге болатын құс фабрикасы салынуда

Түркістан облысының Түлкібас ауданында ет бағытындағы құс фабрикасының құрылысы басталды. Өндіріс қуаттылығы жылына 48 мың тонна құс етін құрайды, деп облыс әкімдігінің баспасөз қызметі  хабарлады.

Жобаны Жабағылы ауылында «Қарқын Трейд» ЖШС жүзеге асыруда. Өндірісті құруға жалпы сомасы 53,7 млрд теңгеге инвестиция тарту жоспарлануда. «Түркістан» ӘКК 5 млрд теңге көлемінде несие береді. Бұдан басқа, мемлекет тарапынан қажетті инфрақұрылымды жүргізу қамтамасыз етілетін болады. Зауыт іске қосылғаннан кейін 1200-ден астам жұмыс орны ашылады деп күтілуде.

«Кәсіпорын 517,7 гектар жер телімінде орналасады. Жоба аясында 96 құс үйі, инкубатор, құрама жем зауыты, газ-электр станциясы, құс сою және қалдықтарды қайта өңдеу цехы, сондай-ақ тоңазытқыш қоймалар салу жоспарлануда», - деп атап өтті әкімдікте.

Жоба үш кезеңде жүзеге асырылады. Бірінші кезең (2026-2027 жылдар) 21,9 млрд теңге көлемінде инвестициялар тартуды, 550 жұмыс орнын құруды және 15 мың тонна өнім өндіруді іске қосуды көздейді. Екінші кезеңде (2028-2029 жылдар) 15,8 млрд теңге инвестиция тартылады, 325 жұмыс орны құрылады, өнім шығару 24 мың тоннаға дейін ұлғаяды. Үшінші кезең (2029-2030 жылдар) 16 млрд теңге көлемінде инвестицияларды, 325 жұмыс орнын ашуды және жылына 48 мың тонна құс етін өндіруді көздейді.