Сыбайлас жемқорлыққа қарсы іс-қимыл агенттігі ҚТЖ-да сыбайлас жемқорлық тәуекелдеріне талдау жүргізеді

Сыбайлас жемқорлыққа қарсы іс-қимыл агенттігі "Қазақстан темір жолы" ҰК" АҚ қызметіндегі сыбайлас жемқорлық тәуекелдеріне сыртқы талдауға кіріседі. Бұл туралы ведомствоның баспасөз қызметі хабарлады.

Талдауды агенттіктің, ҚТЖ компаниясының, мүдделі мемлекеттік органдардың мамандары азаматтық қоғам өкілдерімен бірлесіп жүргізетін болады.

"Талдау барысында темір жол саласындағы сыбайлас жемқорлық құқық бұзушылықтардың себептері мен жағдайлары зерделенеді, бұл ұлттық оператор қызметінің тиімділігіне, бұрын мемлекеттік бюджеттен және Ұлттық қордан алынған қаражаттың жұмсалуына әсер етеді", - деп түсіндірді Сыбайлас жемқорлыққа қарсы іс-қимыл агенттігінде.

Сондай-ақ Агенттік ұлттық компания қызметіндегі сыбайлас жемқорлық тәуекелдері туралы ақпараты бар азаматтарды abdrakhmanov.n@antikor.gov.kz электрондық поштасына жүгінуге шақырады. Мұнда талданатын саланы жетілдіру бойынша ұсыныстар жіберуге болады.

Сондай-ақ, егер сізге сыбайлас жемқорлық фактілері немесе дайындалып жатқан қылмыстар туралы белгілі болса, 1424 Сыбайлас жемқорлыққа қарсы қызметінің Call-орталығына 24/7 режимінде хабарлай аласыз.

Бұған дейін Қазақстанның жүк тасымалдаушылары ҚТЖ-ны нарықты монополиялауға әрекет жасады деп айыптаған болатын. Олар Қазақстан президентіне тиісті үндеу жолдады.

Өткен жылы Сыбайлас жемқорлыққа қарсы іс-қимыл агенттігі Ауыл шаруашылығы министрлігінде сыбайлас жемқорлық тәуекелдеріне сыртқы талдау жүргізді. Бұл жұмыстың қорытындысы 2023 жылы енгізу жоспарланып отырған АӨК субсидиялау схемасының өзгеруі болды.