Маңғыстау облысының екі ауданында ауылдарға жақын аграрлық аймақтар құрылады

Маңғыстау облысының билігі елді мекендердің жанында аграрлық аймақтарды құру туралы фермерлердің бастамасына қолдау көрсетеді. Бұл туралы облыс әкімінің баспасөз қызметінде хабарлады.

«Маңғыстау және Мұнайлы аудандарының елді мекендерге жақын жерлерде агроөнеркәсіптік аймақтар құру мақсатында жұмыстар жүргізу жоспарлануда. Сондықтан, осы салада жұмыс істегісі келетіндерге жан-жақты қолдау көрсетіледі», - деп хабарлады әкімдік. Аталған  қолдау «Агробизнес 2020»  және «Нұр Капитал» аймақтық бағдарламалары аясында  жасалатынын атап өтті.

Сонымен қатар, бұл өңірде жылыжай алаңдарын 27,4 гектардан 34,4 гектарға, ал жылыжай санын 72-ге дейін көбейту жоспарлануда, бұл облыс халқын жергілікті көкөністермен қамтамасыз ету деңгейін арттырады.

Мемлекет басшысының Маңғыстау облысындағы «алқаптан дүкен сөресіне дейін»  ынтымақтастық тізбегін дамыту жөніндегі пилоттық жобасы аясында саудасаттық жүйесінің тетігі қарастырылды. Нәтижесінде, 2020 жылдың аяғында ауылшаруашылық өнімінің көлемі 24 млрд. теңгеге жетеді. Қосымша 700-ден астам жаңа жұмыс орны пайда болады деп күтілуде.

Баспасөз қызметінде айтылғандай, азық-түліктің едәуір бөлігі бұл жерлерге басқа аймақтар мен мемлекеттерден әкелінеді. Сондықтан, жалпы агроөнеркәсіптік кешенде негізгі үш бағыт бойынша жұмыстар істеледі: жаңа жобаларды жүзеге асыру, егістік және суармалы алқаптардың көлемін ұлғайту және агроөнеркәсіптік кешендегі қолданыстағы субъектілерді қолдау.

«Мал шаруашылығын дамыту және жайылымдарды сумен қамтамасыз ету үшін 60 құдық салуға субсидия бөлінеді. «Еңбек» бағдарламасы аясында 300-ден астам жобаға шағын несие беру жоспарланған, оның ішінде кем дегенде  35 жобаға «Қарапайым заттар экономикасы» бойынша қолдау көрсетілетін болады», - деп хабарлады баспасөз қызметі.