Ақтөбе облысында логистикалық хаб құруға 160$ млн инвестиция салады

Investment Aktobe-2022 VII Халықаралық инвестициялық форумы барысында Ақтөбе халықаралық әуежайы базасында интермодульдік тасымалдау мүмкіндігі бар логистикалық хаб құру туралы келісімге қол қойылды. Өзара түсіністік туралы Меморандумға "Ә.Молдағұлова атындағы Халықаралық әуежай" АҚ Басқарма төрағасы Дастан Малиев және S Sistem Lojistik басқарма төрағасы Хусейн Барлин қол қойды. Бұл туралы Ақтөбе облысы әкімінің баспасөз қызметі хабарлады.

"Логистикалық хаб құру жөніндегі жобаны іске асырудың бірінші кезеңінде Ақтөбе әуежайында жүк терминалының құрылысы мен басқаруы жүргізілетін болады. Құрылыстың болжамды ауданы 10 мың шаршы метрді құрайды. S Sistem әуежай аумағында жүк және контейнер терминалдарын салуды жоспарлап отыр және оларды жалғыз уәкілетті оператор ретінде басқаратын болады", - деп хабарлады әкімдік.

Контейнерлік терминалға жабық тарату орталығы, контейнерлерді күтуге арналған тұрақ, тауарлар мен жүктерді сақтауға және өңдеуге арналған қайта тиеу терминалы, әуежайдың жанындағы жер учаскесінде теміржол байланысы бар контейнерлерді ауыстырып тиеу және сақтау кіреді.

Жобаға $160 млн инвестиция салу жоспарлануда.

Тақырып бойынша оқу: Маңғыстауда Ақтау және Құрық порттарын дамыту жоспары ұсынылды

S Sistem Lojistik авиакомпанияларға қызмет көрсететін алғашқы жеке қоймасы бар логистикалық сектордағы инновациялардың ізашары болып табылады. Бүгінде оның 100 мың шаршы метрден астам қоймасы бар, оның ішінде Түркиядағы төрт әуежайда (Измир, Анкара, Анталья және Стамбул). Қазақстанда компания 2022 жылы жұмыс істей бастады.