Алматы облысында ірі логистикалық орталық іске қосылды
Алматы облысының Іле ауданында Kusto Logistics компаниясының көлік-логистикалық орталығы іске қосылды. Нысанның қуаты жылына 100 мың контейнерді өңдеуге мүмкіндік береді. Жобаға 28,1 млрд теңге инвестицияланды, деп облыс әкімінің баспасөз қызметі хабарлады.
26,5 гектардан астам аумақта теміржол, контейнерлер алаңы, екі қойма, жүк тиеу-түсіру орындары, автомобиль логистикасы мен басқару орталығын біріктірген заманауи мультимодальды кешен құрылды.
Логистикалық орталықта сағатына 25 контейнерге дейін өңдеуге қабілетті 45 тонна жүк көтергіштігі бар арнайы кран орнатылған. Кешеннің қуаттылығы ай сайын 111 мың тоннадан астам жүкті өңдеуге мүмкіндік береді.
Қазіргі уақытта кешен аумағында астық терминалының құрылысы жүргізілуде. Жұмыс аяқталғаннан кейін мұнда 14 мың тоннаға дейін ауыл шаруашылығы өнімін сақтауға болады.
Логистикалық орталықтың ашылуында Kusto Group құрылтайшысы және акционері Қанат Көпбаев Алматы облысы арқылы Қазақстандағы контейнерлік жүктердің шамамен 80%-ы өтетінін, олардың едәуір бөлігі елдің солтүстік өңірлерінен келетінін атап өтті.
«Жаңа терминал Қазақстанның солтүстігі мен оңтүстігін байланыстыратын маңызды логистикалық орталық болады. Алматы облысы арқылы импорттық және экспорттық жүктер еліміздің басқа өңірлеріне және көрші мемлекеттерге жіберілетін болады. Соңғы жылдары мемлекет басшысы мен үкіметтің қолдауының арқасында транзиттік сала жоғары қарқынмен дамып келеді. Қазақстан Азия мен Еуропаны байланыстыратын табиғи көпір болып табылады. Егер біз осы мүмкіндікті толық пайдалансақ, транзит ел экономикасына мұнайдан түсетін табыстан асатын табыс әкелуі мүмкін», – деді Қанат Көпбаев.
Іс-шара барысында терминал жұмысының басталуын белгілеген алғашқы контейнерлік пойыз жөнелтілді.
Әкімдік жаңа терминал Алматы облысында жүк тасымалдау мүмкіндіктерін кеңейтетінін, тауарларды қабылдауды, сақтауды және одан әрі жөнелтуді оңтайландыруға мүмкіндік беретінін атап өтті. Бұдан басқа, объект елдің сауда байланыстарын дамытуға және кәсіпкерлер үшін көлік процестерін тиімді ұйымдастыруға ықпал ететін болады.