Ауыл шаруашылығы министрлігі АӨК жобаларын несиелеу қағидаларын әзірледі

Ауыл шаруашылығы министрлігі агроөнеркәсіптік кешен саласындағы жобаларды несиелеу ережесін талқылауға ұсынды.

Құжатқа сәйкес, жергілікті атқарушы органдарға жылдық сыйақы мөлшерлемесі 0,01% болатын 10 жыл мерзімге бюджеттік несиелер берілетін болады. Негізгі борышты өтеу бойынша жеңілдікті кезең 24 айдан аспайды, ал бюджеттік несиені игеру кезеңі - 12 айды құрайды.

Өз кезегінде әкімдіктер агробизнесті сенім білдірілген өкіл (агент) арқылы мынадай шарттармен несиелейтін болады: несие мерзімі – 10 жылға дейін, несиенің ең жоғары сомасы – 5 млрд теңге; номиналды сыйақы мөлшерлемесі – жылдық 2,5% - дан аспайды. Негізгі борыш пен сыйақыны өтеу бойынша жеңілдікті кезең несиелеу мерзімі ұзақтығының үштен бірінен аспайтын кезеңді құрайды. Кепілмен қамтамасыз етудің болуы міндетті.

Несиелер жаңаларын құруға немесе қолданыстағыларын кеңейтуге беріледі:

• сүт-тауар фермалары (қуаты 400 басқа дейін);
• ет бағытындағы құс фабрикалары (жылына 5 мың тоннадан бастап құс еті);
• көкөніс сақтау қоймалары (1000 тоннадан бастап);
• суармалы егіншілік (картоп пен көкөністер, жемшөп өндірісі) қазіргі заманғы су үнемдеу технологияларын пайдалана отырып (жаңбырлатып, тамшылатып суару).

Қағидаларда несие берілетін сенім білдірілген өкіл (агент) қарыз алушы шарттың міндеттемелерін бұзған жағдайларды қоспағанда, қандай да бір комиссиялар, алымдар немесе өзге де төлемдер алмайтыны ескертіледі. Бұл ретте мұндай төлемдердің мөлшері алдын ала жергілікті атқарушы органмен жазбаша келісіледі. Сенім білдірілген өкілге сыйақы төлеуді жергілікті атқарушы орган жергілікті бюджет қаражаты есебінен жүзеге асырады.

Тақырып бойынша оқу: ҚазАгроҚаржы қаржыландырудың жаңа бағдарламаларын іске қосты

Жобаларды іріктеудің негізгі критерийлері:

• әлеуметтік маңызы бар азық-түлік тауарларының импортты алмастыруын ескере отырып, салалық орындылығы;
• өңір тұрғындарын сапалы және қолжетімді азық-түлікпен қамтамасыз ету;
• уақытша және тұрақты жұмыс орындарын құру;
• ауыл халқының табысын арттыру шеңберінде жобалармен ынтымақтастық және кооперация;
• ауыл шаруашылығы өнімдерін өндіру немесе қайта өңдеу саласында кемінде бес жыл жұмыс тәжірибесінің болуы;
• несиелікк және лизингтік міндеттемелер бойынша мерзімі өткен берешектің 90 күннен артық болмауы;
• берік жемшөп базасын қалыптастыру, ауыл шаруашылығы техникасы паркін материалдық-техникалық жарақтандыру үшін ауыл шаруашылығы алқаптарының қажетті алаңының болуы.