Қазақстанда аграрлық туризмді дамытуға ниетті

Қазақстанның Туризм министрлігі фермерлерге өз жерлерінде агротуризммен айналысуға мүмкіндік беруді ұсынып отыр. Бұл туралы ведомствоның кеңейтілген алқа мәжілісінде ҚР Туризм және спорт министрі Ермек Маржықпаев мәлім етті.

«Мұндай шараның қабылдануы 10 мыңнан астам ауыл тұрғындарын қосымша жұмыспен қамту арқылы ауылдардың әл-ауқатының деңгейін көтеруге ықпал етеді. Бұл әсіресе Қазақстанның шығыс және оңтүстік өңірлерінде өзекті», - деді Маржықпаев.

Ол туризм саласында екінші жыл кәсіпкерлердің белсенділігін ынталандыруға бағытталған мемлекеттік қолдау шаралары бар екенін еске салды. Сондай-ақ, ведомство саланы дамыту үшін жаңа бастамаларды пысықтауда. Өткен жылдың қорытындысы бойынша мемлекеттік қолдауға мақұлданған өтінімдер көлемі 2022 жылмен салыстырғанда сегіз есеге ұлғайды. Осылайша, жалпы сомасы 800 млн теңгеден астам өтінімдер мақұлданды.

Бұған дейін хабарланғандай, Қазақстанда фермерлерге өз шаруашылықтарының аумағында алаңның 10%-дан аспайтын қонақ үйлер мен глэмпинг салуға рұқсат беру жоспарлануда.

Статистика бойынша Қазақстанда 219 мың фермерлік және шаруа қожалықтары бар. Егер 219 мың фермерлік шаруашылықтың кем дегенде 1%-ы (2,2 мың бірлік) қонақ үйлерді ұйымдастырса және туристерге қызмет көрсету үшін кем дегенде екі адамды жалдайтын болса, онда жыл сайын ауылдық жерлерде 6,6 мың адам жұмысқа орналасады деп болжанған.