QazTrade экспорттаушыларды қолдау бағдарламасын іске қосты
QazTrade сауда саясатын дамыту орталығы «Экспорттық акселерация-2024» бағдарламаларына қатысу үшін және Alibaba.com халықаралық сауда платформасына шығару бойынша қазақстандық компанияларды іріктеуді жариялады. Іріктеу 1-31 наурыз аралығында өтеді.
«Биыл экспорттық акселерацияға қатысу үшін машина жасау, химия, жеңіл және азық-түлік өнеркәсібі, сондай-ақ қызмет көрсетушілер сияқты салалардың 120 кәсіпорны іріктелетін болады. Бағдарламаның негізгі міндеті — мемлекеттік қолдаудың кешенді шараларының көмегімен қазақстандық компаниялардың экспорттық әлеуетін арттыру», - деп хабарлады QazTrade.
Жобаға қатысу үшін шикізаттық емес бағыттағы шағын және орта бизнестің келешекті кәсіпорындары таңдалатын болады. Акселерация шеңберінде кәсіпкерлерге бірқатар қызметтер көрсетіледі: компанияның және оның өнімдерінің әлеуетін талдамалық бағалау, сыртқы сауда қызметінің ережелерін оқыту, қолайлы нарықты таңдауға жәрдемдесу, сатып алушыны іздеу, маркетингтік науқан жүргізу, B2B-кездесулерді ұйымдастыру және экспортқа арналған құжаттар тізбесін қалыптастыру.
QazTrade мәліметтері бойынша, 2020 жылдан 2023 жылға дейін Қазақстанда экспорттық акселерация бағдарламасына 400-ден астам шағын және орта кәсіпорын қатысты. Жақында қызмет көрсететін компаниялар бағдарламаға тұрақты қызығушылық танытуда.
Made in KZ тауарларын шетелде ілгерілету және танымал ету үшін QazTrade кәсіпорындарға ірі халықаралық маркетплейстерге, атап айтқанда Alibaba.com сауда платформасына шығуға көмектеседі. Биылғы жылы 70 қазақстандық шикізаттық емес тауар өндірушілер мен жеткізушілер Gold Supplier (алтын жеткізуші) премиум мәртебесін ала алады. Бағдарлама шеңберінде кәсіпкерлерді платформада жұмыс істеуге және тауарларды ілгерілетуге оқыту, өнімді экспорттау кезінде толық сервистік қызмет көрсету және сүйемелдеу көзделген. Цифрлық алаңды сатып алушылар арасында қазақстандық азық-түлік өнімдері – күнбағыс және рапс майы, шоколад және басқа да тауарлар үлкен сұранысқа ие.