Азық-түлік корпорациясы су тасқынынан зардап шеккендерге 150 тонна азық-түлік жіберді

Азық-түлік корпорациясы су тасқынынан зардап шеккен аймақтарға гуманитарлық көмек ретінде өз резервінен 150 тонна ауылшаруашылық өнімдерін жіберді.

«Бүгінгі таңда Қостанай, Атырау, Солтүстік Қазақстан және Батыс Қазақстан облыстарына қант, қарақұмық, ұн, күріш және жеміс-көкөніс өнімдерін қоса алғанда 150 тоннадан астам ауыл шаруашылығы өнімі жөнелтілді», - деп хабарлады Азық-түлік корпорациясы. 

Гуманитарлық көмекті қалыптастыру мен жіберуді ұйымдастыруға облыстық өкілдіктер мен Азық-түлік корпорациясының еншілес ұйымдары жұмылдырылған. «Астық Транс» компаниясы гуманитарлық көмекті өтеусіз жеткізу арқылы көмек көрсетті.

Ұлттық компанияның баспасөз қызметі егер зардап шеккен өңірлерде жемдік астыққа қажеттілік туындаса, Ауыл шаруашылығы министрлігі Азық-түлік корпорациясымен бірлесіп мал және құс шаруашылықтарын астықпен жедел қамтамасыз етуді ұйымдастыратынын атап өтті. Қажет болған жағдайда ҚР АШМ жедел желісінің телефондары арқылы хабарласуға болады: 8 (7172) 573 358 немесе 8 (747) 0943 381.