Қостанай облысында 80-ге жуық шаруа қожалықтары су тасқынынан зардап шекті

Қостанай облысының кәсіпкерлер палатасынан су тасқынынан зардап шеккен 76 ауыл шаруашылығы өндірушісі, оның ішінде 68 ШҚ, жеті ЖК және бір ЖШС консультациялық көмек сұрады. Бұл туралы «Атамекен» ұлттық кәсіпкерлер палатасының баспасөз қызметі хабарлады.

Өлген мал иелеріне өтемақы төлене бастады. Облыс әкімдігінің мәліметінше, бүгінгі таңда жалпы сомасы 102 млн теңгеден асатын 780 бас мал шығыны үшін төлем жүргізілді.

«Ауыл шаруашылығы өндірушілерінде су басқан егіс алқаптары, техника, тұқым материалы және жемшөп, тыңайтқыштар, тауарлық астық бойынша сұрақтар туындайды. Мал және қойма бөлмелері, жылыжайлар зардап шекті. Су тасқыны балық өсіретін шаруашылықтардан балық пен шабақтарды жуып тастады (балық тоғанының бөгетінің бұзылуы, өсірілген балықпен екі көлді су басу, балық өсіру инкубациялық-шабақты цехы зардап шекті). Омарташылар ұяларынан айырылды», - деп хабарлады палатада.

Аталған мәселелердің барлығы «Атамекен» ҰКП-ға залалды өтеу жөніндегі қағидалар жобасына енгізу үшін жіберілгені хабарланды. Естеріңізге сала кетейік, «Атамекен» ҰКП бастамасымен Ауыл шаруашылығы министрлігі ауыл шаруашылығы саласындағы табиғи сипаттағы төтенше жағдай салдарынан жеке және заңды тұлғаларға келтірілген залалды өтеу қағидаларының жобасын әзірледі.