Ауыл шаруашылығы министрлігі ауыл шаруашылығы тауарларының экспорты мен импортының процестерін цифрландырады
Ауыл шаруашылығы министрлігі ауыл шаруашылығы мақсатындағы тауарлардың Қазақстан шекарасы арқылы (экспорт-импорт) өту процестерін цифрландыруды бастауды жоспарлап отыр. Бұл туралы ведомствоның баспасөз қызметінен хабарлады.
Аталған шаралар барлық мал шаруашылығы өнімдерінің өтпелі қадағалануын, жануарлар мен жануарлардан алынатын жүктердің электрондық сертификатталуын қамтамасыз етуге, сондай-ақ олардың қозғалу жолдарын қадағалауға мүмкіндік беретіні атап өтілді.
Қазіргі уақытта мал шаруашылығы өнімдерін қадағалау бойынша пилоттық жоба іске асырылуда. Ағымдағы жылы республикалық маңызы бар барлық облыстар мен қалаларда «Етті ветеринариялық-санитариялық сараптау» модулін енгізу аяқталады, бұл сараптама актілерін беру процесін автоматтандыруға және жануардың өмірлік циклінің қадағалануын қамтамасыз етуге мүмкіндік береді.
Сондай-ақ, жаңа цифрлық жүйе - карантиндеу және ҚР шегінен тыс жануарларды әкету кезінде карантинден өтудің толық циклін қадағалау үшін квоталау әзірленуде. Жүйені іске қосу ағымдағы айда жоспарланып отыр.
Ауыл шаруашылығы министрі Айдарбек Сапаров Алматы облысындағы Ветеринариялық қауіпсіздік мәселелері жөніндегі көшпелі кеңесте өңірдің ветеринариялық қызметі жұмысындағы бірқатар кемшіліктерді, оның ішінде жануарлардың бақылаусыз қозғалуын, жануарларды диагностикалық зерттеулермен уақтылы қамтылмауын, иелерінің ауру жануарларды санитариялық союға тапсыру туралы нұсқамаларды сақтамауын атап өтті.
Ветеринарлық дәрігерлердің жұмысының сапасы сынға алынды.
«Жергілікті ветеринарлық қызметтердің жұмысын күшейту қажет. ЖАО ветеринарлары жануарларды бірдейлендіру және халық арасында қауіпсіздік шаралары бойынша ағарту жұмыстарын жүргізуі керек. Ауруды болдырмау үшін барлық шаруашылықтарды толық бақылау қажет», - деді Сапаров.
Сондай-ақ, кеңесте жұқпалы аурулар ошақтарының алдын алу және жою мәселелеріне ерекше назар аударылды. Осыған байланысты АӨК дамытудың 2021-2030 жылдарға арналған тұжырымдамасына сәйкес барлық өңірлерді ветеринариялық пункттермен, мал қорымдарымен/инсинераторлармен және сою объектілерімен қамтамасыз ету жөніндегі жұмыстарды жеделдету қажеттігі атап өтілді.
«Бүгінгі таңда бұл бағытта тек СҚО және Жетісу облысы жұмыс істейді, бірқатар басқа өңірлерде жұмыс ішінара жүргізілуде», - деп атап өтті министр әкімдіктердің ветеринариялық қызметтері индикативтерінің орындалуына мониторинг жүргізу жөніндегі жұмыс тобын құруды тапсырып.
Әлсіз бақылау үшін бірқатар облыстардың аумақтық инспекцияларының басшыларына сөгіс жарияланды.