БҚО-да бюрократия салдарынан құны 1,2 млрд теңгелік ет жобасына қауіп төнді

Батыс Қазақстан облысының Бәйтерек ауданында прокуратура инвесторға құны 1,2 млрд теңге болатын ферма салу жобасы үшін жер учаскесін жалға алуды ұзартуға көмектесті. Бұл туралы ведомствоның баспасөз қызметінен хабарлады.

Прокуратураның мәліметінше, «KAZMEAT Ақжайық» компаниясы жемшөп дақылдарын өсіру үшін тұрақты суару жүйесін және репродуктор-ферманы салуды жоспарлап отыр. Жобалық қуатқа шыққаннан кейін кәсіпорын 800 га жемшөп дайындап, 200 бас ірі қара малды ұстай алады. Жоба сонымен қатар 30 жұмыс орнын құруды көздейді.

Дегенмен, әкімшілік мәселеге байланысты оны жүзеге асыруға қауіп төнді. Инвестор суару және мал азығын өсіруге қажетті жер учаскесін жалға алу мерзімін ұзарту үшін аудандық әкімдікке өтініш берді. Алайда өтініш белгіленген мерзімде қаралмады.

Осыған байланысты жобаны іске асыру мерзімдерін бұзу қаупі туындады. Инвестор өз құқықтарын қорғау үшін аудан прокуратурасына жүгінді.

Прокуратура араласқаннан кейін жер учаскесін жалдау мерзімі ұзартылды. Осылайша, жобаны жүзеге асыруға кедергі болатын әкімшілік кедергі жойылды.

Прокурорлық актіні қарау қорытындысы бойынша кінәлі лауазымды тұлға тәртіптік жауапкершілікке тартылды.