Қазақстанның тұқым өсірушілеріне мемлекеттік қолдау артады
ҚР Ауыл шаруашылығы министрлігі отандық саланы қолдау шараларын күшейту мақсатында тұқым шаруашылығын дамыту жөніндегі бес жылдық Кешенді жоспарды қайта қарайды. Бұл туралы ШҚО ауыл шаруашылығы тауарын өндірушілермен кездесуінде ауыл шаруашылығы министрі Айдарбек Сапаров айтты, деп хабарлады ҚР АШМ баспасөз қызметі.
«Тұқым шаруашылығын дамыту жөніндегі кешенді жоспар қабылданды, оны қайта қарап, отандық тұқым шаруашылығы шаруашылықтарын қолдау үшін түзетулер енгізетін боламыз. Бірақ сіз де тұқымның сапасын қамтамасыз етуіңіз керек», - деді Сапаров «Майлы дақылдардың тәжірибелік шаруашылығы» ЖШС бас директоры Фарид Әбітаевтың отандық тұқым шаруашылығын қолдау шараларын күшейту туралы өтінішіне жауап бере отырып.
АШМ басшысы қазір тұқымдардың 70%-ы субсидияланатынын, гербицидтер 50%-ға, тыңайтқыштар 60%-ға, техника 30%-ға, сүт өткізу 20-дан 45 теңгеге дейін, ет те субсидияланатынын атап өтті.
«Жалпы, шаруа қожалықтарына мемлекет тарапынан жақсы қолдау көрсетілуде, бірақ фермерлер де өз қаражаттарын салуы керек», - деді Сапаров.
Сондай-ақ министр ауыл шаруашылығы құрылымдарының басшыларын өз шаруашылықтарын жаңғырту және дамыту үшін қолжетімді қаржы құралдарын белсенді пайдалануға шақырды, бұл өңірлік АӨК тиімділігі мен бәсекеге қабілеттілігін арттыруға мүмкіндік береді.
«Маңызды мәселе: бизнестің әлеуметтік жауапкершілігі. Сіздер халыққа, өз қызметкерлеріңізге жағдай жасап, қолдау көрсетіп, әлеуметтік нысандар салып, инфрақұрылымды дамытып, тұрғын үймен қамтамасыз етулеріңіз керек. Бұл кадр мәселесін де шешуге мүмкіндік береді», - деп атап өтті министр.
ШҚО-ға жұмыс сапары аясында министр Шығыс Қазақстан Ауыл шаруашылығы тәжірибе станциясында болды, онда оған дәнді, дәнді-бұршақты және майлы дақылдарды өсіру, тұқым шаруашылығы, сондай-ақ зерттеулер мен әзірлемелер туралы айтып берді. Станция негізінде тестілеу орталығы, білімді тарату орталығы жұмыс істейді.
Сонымен қатар, ол егін жинау жұмыстарының барысымен танысты. Бүгінгі таңда өңірде астық алқаптарының 84,6%-ы жиналды, 472,1 мың тонна бастырылды. Өнімділік орта есеппен гектардан 22 ц құрайды. Өңірдің ауыл шаруашылығы тауар өндірушілеріне 43 мың тонна минералды тыңайтқыштар жөнелтілді. 1,3 млн тонна шөп немесе бір жарым жылдық жоспардың 86%, 161 мың тонна пішен, 134,3 мың тонна сүрлем, 46,1 мың тонна сабан және 43,7 мың тонна құнарлы жем дайындалды.
Сапаров жұмыс сапары барысында «Рулиха» ЖШС-нің 1080 басқа арналған сүт-тауар фермасына барып, қолданыстағы ферманы кеңейту жобасының іске асырылуымен танысты. ЖШС СҚО тәжірибесін тираждау жөніндегі бағдарлама шеңберінде қаржыландыруды алды және ағымдағы жылы жобаны аяқтайды.