Ақмола облысында 15 мың гектар пайдаланылмаған жер мемлекет меншігіне қайтарылды

Құны 150 млн теңге болатын пайдаланылмаған алты жер телімі Ақмола облысында мемлекеттік меншікке қайтарылды. Бұл туралы облыс прокуратурасының баспасөз қызметі хабарлады.

"Ағымдағы жылы қадағалау актісі бойынша жалпы ауданы 15 мың га, кадастрлық құны 150 млн теңге болатын алты жер телімі қайтарылды, олар үш жылдан астам уақыт бойы мақсатына сай пайдаланылмады", - деп хабарлады ведомстводан.

Сондай-ақ, Ерейментау ауданы прокуратурасының бастамасымен сотта жалпы ауданы 59,2 мың га, жалпы кадастрлық құны 408 млн теңге болатын сегіз жер телімін қайтару туралы азаматтық істер қаралуда.

Бұл бағыттағы жұмыс жалғасуда, деп атап өтті прокуратурада.

Естеріңізге сала кетейік, Қазақстанда ауыл шаруашылығы жерлерін қайтару тәсілдері өзгерді. Қазақстанның Президенті Қасым-Жомарт Тоқаев әкімдіктер заң бұзушылықпен берген ауыл шаруашылығы жерлерін мақсатына сай пайдаланған жағдайда қайтару тәжірибесін тоқтатуды тапсырды.